ଶିକ୍ଷା ଆଗରେ ହାର ମାନିଲା ବୟସ ! ୯୬ ବର୍ଷ ବୟସରେ ହାଇସ୍କୁଲ ଯାଉଛନ୍ତି ମହିଳା, ଅନ୍ୟ ପାଇଁ ସାଜିଲେ ଉଦାହରଣ
ଶିକ୍ଷା ଆଗରେ ହାର ମାନିଛି ବୟସ । କୌଣସି ବିଷୟରେ ଜାଣିବାକୁ ଇଚ୍ଛା ଥିଲେ ଏଥିରେ ବୟସ ବାଧା ସୃଷ୍ଟି କରିପାରେ ନାହିଁ ।ଆଉ ଏହାର ପ୍ରତ୍ୟେକ୍ଷ ଉଦାହରଣ ହେଉଛନ୍ତି ମେକ୍ସିକୋର ୯୬ ବର୍ଷିୟ ମହିଳା ଗ୍ୱାଡାଲୁପ ପାଲାସିଅସ । ଯେଉଁ ବୟସରେ ଆରାମ କରିବା କଥା ସେହି ବୟସରେ ନିଜ ସ୍ୱପ୍ନକୁ ପୂରଣ କରିବା ପାଇଁ ଯାଉଛନ୍ତି ସ୍କୁଲ । ଦୃଢ ଆତ୍ମବିଶ୍ୱାସ ହିିଁ ତାଙ୍କୁ ଆଗକୁ ବାଟ କଢାଇ ନେଇଛି । ୯୬ ବର୍ଷ ପରିଣତ ବୟସରେ ଚେହେରା ମଳିନ ପଡିଛି, କେଶ ଧଳା ହୋଇଯାଇଛି କିନ୍ତୁ ଗ୍ୱାଡାଲୁପଙ୍କ ମନୋବଳ ଉପରେ ବୟସର ଛାପ ପଡିନାହିଁ ।
Kanak News is now on WhatsApp
Join and get latest news updates delivered to you via WhatsApp
ଚେହେରାରେ କୁଞ୍ଚ ପଡିଛି ସତ କିନ୍ତୁ ପାଠ ପଢିବା ପାଇଁ ତାଙ୍କ ଭିତରେ ଥିବା ଉତ୍ସାହ ଅନ୍ୟ ମାନଙ୍କୁ ନିଶ୍ଚିତ ଭାବେ ପ୍ରେରଣା ଯୋଗାଇବ । ଏହାସହ, ୧୦୦ ତମ ଜନ୍ମଦିନ ପୂର୍ବରୁ ହାଇସ୍କୁଲ ପାଠପଢା ଶେଷ କରିବାକୁ ସେ ଲକ୍ଷ୍ୟ ରଖିଛନ୍ତି । ଏହା ତାଙ୍କ ଜୀବନର ସବୁଠାରୁ ବଡ ଇଚ୍ଛା ବୋଲି କହିଛନ୍ତି ଗ୍ୱାଡାଲୁପ ପାଲାସିଅସ । ଏକ ଗରିବ ଘରେ ଜନ୍ମ ନେଇଥିବା ଗ୍ୱାଡାଲୁପ ପାଲାସିଅସ ପରିବାରକୁ ସାହାର୍ଯ୍ୟ କରିବା ପାଇଁ କ୍ଷେତରେ କାମ କରୂୁଥିଲେ । ଯେଉଁଥିପାଇଁ ସେ ହାଇସ୍କୁଲ ଶିକ୍ଷାରୁ ବଞ୍ଚିତ ହୋଇଥିଲେ । ଏସବୁ ଭିତରେ ସେ ଦୁଇଥର ବିବାହ କରିଥିଲେ । ତେଣୁ ସାଂସରିକ ଜୀବନରୁ ସମୟ କାଢି ପାଠ ପଢିବା ତାଙ୍କ ପାଇଁ ସମ୍ଭବପର ନଥିଲା ।
କିନ୍ତୁ ପରିଣତ ବୟସରେ ଯେତେବେଳେ ପାଠ ପଢିବା ପାଇଁ ସୁଯୋଗ ମିଳିଲା ତାହାକୁ ହାତଛଡା କରିବାକୁ ଚାହିଁଲେନି ଗ୍ୱାଡାଲୁପ ପାଲାସିଅସ । ନିଜ ଠାରୁ ୮୦ ବର୍ଷ ଛୋଟ ପିଲାଙ୍କ ସହ ମିଶି ପାଠ ପଢିବାକୁ ନିଷ୍ପତି ନେଲେ ଏବଂ ଏକ ରେଗୁଲାର ପବ୍ଲିକ ସ୍କୁଲରେ ଆଡମିଶନ କରିବା ସହ ନିଜ ସ୍ୱପ୍ନ ପୂରଣ କରିବା ପାଇଁ ଆଗକୁ ପାଦ ବଢାଇଛନ୍ତି । ଏହାଛଡା ଅନ୍ୟ ପିଲାମାନଙ୍କ ଭଳି କଳା ରଙ୍ଗର ସ୍କଟ, ଧଳା ସାର୍ଟ ଓ ହଳିଦିଆ ରଙ୍ଗର ସ୍ୱେଟର ପିନ୍ଧି ପ୍ରଥମ ଦିନ ସ୍କୁଲ ଯାଇଥିଲେ ଗ୍ୱାଡାଲୁପ ପାଲାସିଅସ । ଛାତ୍ରଛାତ୍ରୀ ମାନେ ଗ୍ୱାଡାଲୁପ ପାଲାସିଅସଙ୍କୁ ସ୍କୁଲ ୟୁନିଫର୍ମରେ ଦେଖି ଆଶ୍ଚଯ୍ୟ ହୋଇଥିଲେ ।
ଗ୍ୱାଡାଲୁପ ପାଲାସିଅ ୯୨ ବର୍ଷ ବୟସରେ ପଢିବା ପାଇଁ ଚିନ୍ତା କରିଥିଲେ । ଏହାପରେ ସାକ୍ଷରତା କାର୍ଯ୍ୟକ୍ରମରେ ନାମ ଲେଖାଇଥିଲେ । ୨୦୧୫ରେ ପ୍ରାଥମିକ ସ୍କୁଲ କାର୍ଯ୍ୟକ୍ରମରେ ଆଡମିଶନ ନେଇଥିବା ଗ୍ୱାଡାଲୁପ ପାଲାସିଅସ ଚାରି ବର୍ଷରୁ କମ ସମୟ ମଧ୍ୟରେ ପ୍ରାଥମିକ ଓ ମାଧ୍ୟମିକ ପାଠ ପଢା ଶେଷ କରିଥିଲେ । ଏବେ ହାଇସ୍କୁଲ ଶିକ୍ଷା ସମାପ୍ତ କରିବା ସହ ନିଜ ଜୀବନର ଏକ ବଡ ସ୍ୱପ୍ନ ପୂରଣ କରିବାକୁ ଲକ୍ଷ୍ୟ ରଖିଛନ୍ତି ଗ୍ୱାଡାଲୁପ ପାଲାସିଅସ ।