ମ୍ୟାନହୋଲରେ ଗୋଟିଏ ରାତି ! ଅସୁରକ୍ଷିତ ରାଜଧାନୀର ରାସ୍ତା, ୨୦ଫୁଟ ତଳକୁ ଖସିପଡିଲେ ୭୫ ବର୍ଷିୟା ବୃଦ୍ଧା
କନକ ବ୍ୟୁରୋ : ସ୍ମାର୍ଟସିଟିର ସ୍ମାର୍ଟ ରାସ୍ତା । ରାସ୍ତା ମଝିରେ ବଡ ବଡ ଗାତ । ଥରେ ଗାତ ଭିତରେ ପଡିଲେ ଉଠିବା ଅସମ୍ଭବ । ସ୍ମାର୍ଟସିଟି ଭୁବନେଶ୍ୱରର ରାସ୍ତାର ଅବସ୍ଥା ଏମିତି । ରାସ୍ତା ମଝିରେ ବଡ ବଡ ମ୍ୟାନହୋଲ ପାଇଁ ଲୋକେ ଅନେକ ସମୟରେ ହଇରାଣ ହେଉଥିବାର କଥା ସାମ୍ନାକୁ ଆସିଛି । ଆଉ ଗତକାଲି ପୁଣିଥରେ ଏହାର ପୁନରାବୃତ୍ତି ଦେଖିବାକୁ ମିଳିଛି । ଏଥର ମ୍ୟାନହୋଲରେ ପଡି ଯାଇଛନ୍ତି ୭୫ ବର୍ଷିୟା ବୃଦ୍ଧା । ମ୍ୟାନହୋଲରେ ପଡି ସାରା ରାତି ଛଟପଟ ହେଲେ ବୃଦ୍ଧା । ଘଟଣାଟି ଘଟିଛି ପୁରୁଣା ଭୁବନେଶ୍ୱରର ବିଏମସି ହସପିଟାଲ ପଛପଟ ଅଞ୍ଚଳରେ ।
Kanak News is now on WhatsApp
Join and get latest news updates delivered to you via WhatsApp
ଗତକାଲି ରାତି ୮ଟା ବେଳେ ରାସ୍ତାରେ ଯାଉଥିବା ସମୟରେ ୨୦ଫୁଟର ମ୍ୟାନହୋଲରେ ଖସି ପଡିଥିଲେ ୭୫ବର୍ଷୀୟ ଦୁଃଖୀ ସେଠୀ । ଠିକରେ ଚାଲି ପାରୁନଥିବା ବୃଦ୍ଧା ଜଣକ ମ୍ୟାନହୋଲରେ ଖସି ପଡିବା ପରେ ଉଠିବା ତାଙ୍କ ପକ୍ଷେ ସମ୍ଭବପର ହୋଇ ପାରିନଥିଲା । ସାରା ରାତି ସହାୟତା ପାଇଁ ଚିକ୍ରାର କରିଥିଲେ ମଧ୍ୟ କେହି ତାଙ୍କ କଥା ଶୁଣିନଥିଲେ । ପୂରା ରାତି କଟିଥିଲା ମ୍ୟାନହୋଲ ଭିତରେ ।
ଆଜି ସକାଳୁ ସ୍ଥାନୀୟ ଲୋକେ ତାଙ୍କ ଚିକ୍ରାର ଶୁଣିବା ପରେ ପୁଲିସକୁ ଖବର ଦେଇଥିଲେ । ପରେ ଅଗ୍ନିଶମ ବିଭାଗ ଘଟଣାସ୍ଥଳରେ ପହଂଚି ଗୁରୁତର ଅବସ୍ଥାରେ ତାଙ୍କୁ ଉଦ୍ଧାର କରି କ୍ୟାପିଟାଲ ହସ୍ପିଟାଲରେ ଭର୍ତି କରିଛି । ଏହି ଘଟଣା ପରେ ରାସ୍ତା ମଝିରେ ଥିବା ମ୍ୟାନହୋଲକୁ ଯଥାଶୀଘ୍ର ବନ୍ଦ କରିବା ପାଇଁ ସ୍ଥାନୀୟ ଲୋକ ଦାବି କରିଛନ୍ତି । ଭୁବନେଶ୍ୱର ୧ ନମ୍ବର ସ୍ମାର୍ଟସିଟିର ମାନ୍ୟତା ପାଇଛି ସତ କିନ୍ତୁ ରାଜଧାନୀ ରାସ୍ତାର ବାସ୍ତବ ଚିତ୍ର ଏ ଯାଏଁ ମଧ୍ୟ ବଦଳିନାହିଁ । ଯାହା ସରକାରଙ୍କ ଉଦାସୀନତାକୁ ଦର୍ଶାଉଛି ।