ଲୋକସଭା ଆସନରେ ୯ରୁ ୭ ପ୍ରାର୍ଥୀ ବଦଳାଇଲା ବିଜେଡି ! ନୂଆ ଚେହେରାଙ୍କୁ ଭରସା କରି ୧୯ ନିର୍ବାଚନ ପାର ହେବାକୁ ଚେଷ୍ଟା ।
କନକ ବ୍ୟୁରୋ : ତୃତୀୟ ଏବଂ ଚତୁର୍ଥ ପର୍ଯ୍ୟାୟ ନିର୍ବାଚନ ପାଇଁ ଆଜି ପ୍ରାର୍ଥୀ ଘୋଷଣା କରିଛି ବିଜୁ ଜନତା ଦଳ । ୯ଟି ଲୋକସଭା ଆସନ ଏବଂ ୩୬ଟି ବିଧାନସଭା ଆସନରେ ପ୍ରାର୍ଥୀ ତାଲିକା ଘୋଷଣା କରିଛନ୍ତି ବିଜେଡି ସୁପ୍ରିମୋ ନବୀନ ପଟ୍ଟନାୟକ । ତେବେ ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ୯ଟି ଲୋକସଭା ଆସନରୁ ୭ଟି ଆସନରେ ପ୍ରାର୍ଥୀ ବଦଳାଇଛି ବିଜେଡି । କେବଳ ପୁରୀ ଓ ବାଲେଶ୍ୱରରେ ପ୍ରାର୍ଥୀ ପରିବର୍ତ୍ତନ କରାଯାଇନାହିଁ ।
Kanak News is now on WhatsApp
Join and get latest news updates delivered to you via WhatsApp
ପୁରୀ ଲୋକସଭା ଆସନରେ ୨୦୧୪ ନିର୍ବାଚନରେ ପିନାକୀ ମିଶ୍ର ପ୍ରାର୍ଥୀ ହୋଇଥିବା ବେଳେ ଏଥର ମଧ୍ୟ ଦଳ ତାଙ୍କୁ ପୁରୀରୁ ନିର୍ବାଚନ ମଇଦାନକୁ ଓହ୍ଲାଇଛି । ସେହିପରି ବାଲେଶ୍ୱର ଲୋକସଭା ଆସନରୁ ରବିନ୍ଦ୍ର ଜେନାଙ୍କୁ ପୁଣି ଥରେ ପ୍ରାର୍ଥୀ କରିଛି ଦଳ । ଆଉ ଏହାରି ଭିତରେ ଆଜି ଘୋଷଣା ହୋଇଥିବା ଅନ୍ୟ ୭ଟି ଲୋକସଭା ଆସନରେ ପ୍ରାର୍ଥୀ ବଦଳାଯାଇଛି । ଭୁବନେଶ୍ୱର ଲୋକସଭା ଆସନରୁ ୧୯୯୮ ମସିହାରୁ ପ୍ରାର୍ଥୀ ହୋଇ ଆସିଥିବା ପ୍ରସନ୍ନ ପାଟ୍ଟଶାଣୀଙ୍କ ଏଥର ଟିକେଟ୍ କଟିଛି । ତାଙ୍କୁ ରାଜ୍ୟସଭା ପଠାଇବା ପାଇଁ ନବୀନ ଘୋଷଣା କରିଥିବା ବେଳେ ଭୁବନେଶ୍ୱରରୁ ଏଥର ନିର୍ବାଚନ ମଇଦାନକୁ ଓହ୍ଲାଇଛନ୍ତି ମୁମ୍ବାଇର ପୂର୍ବତନ ପୋଲିସ କମିଶନର ଅରୂପ ପଟ୍ଟନାୟକ ।
ସେହିପରି ଯାଜପୁର ଲୋକସଭା ପାଇଁ ମଧ୍ୟ ଏଥର ପ୍ରାର୍ଥୀ ବଦଳାଇଛି ଦଳ । ୨୦୧୪ ନିର୍ବାଚନରେ ରୀତା ତରାଇ ପ୍ରାର୍ଥୀ ହୋଇଥିବା ବେଳେ, ଏଥର ସର୍ମିଷ୍ଠା ସେଠୀଙ୍କୁ ପ୍ରାର୍ଥୀ କରିଛି ବିଜେଡି । ସେହିପରି କେନ୍ଦ୍ରାପଡା ଲୋକସଭା ଆସନରେ ୨୦୧୪ ନିର୍ବାଚନରେ ବିଜେଡି, ବୈଜୟନ୍ତ ପଣ୍ଡାଙ୍କୁ ପ୍ରାର୍ଥୀ କରିଥିବା ବେଳେ, ଏଥର ବୈଜୟନ୍ତ ବିଜେପିରୁ ଏହି ଆସନରେ ଲଢୁଛନ୍ତି । ଆଉ କେନ୍ଦ୍ରାପଡାରେ କଡା ଟକ୍କର ହେବାକୁ ଯାଉଥିବା ବେଳେ, ବିଜେଡି ଅନୁଭବ ମହାନ୍ତିଙ୍କୁ ପ୍ରାର୍ଥୀ କରିଛି । ସେପଟେ ଜଗତସିଂହପୁରରେ ମଧ୍ୟ ପ୍ରାର୍ଥୀ ବଦଳାଇଛି ଦଳ । ଗତ ନିର୍ବାଚନରେ କୁଳମଣି ସାମଲ ଜଗତସିଂହପୁର ଲୋକସଭା ଆସନ ପାଇଁ ବିଜେଡି ପ୍ରାର୍ଥୀ ହୋଇଥିବା ବେଳେ, ଏଥର ରାଜଶ୍ରୀ ମଲ୍ଲିକଙ୍କୁ ପ୍ରାର୍ଥୀ କରିଛି ଦଳ ।
ସମ୍ବଲପୁର ଲୋକସଭା ଆସନ ପାଇଁ ଏଥର ନଳିନୀକାନ୍ତ ପ୍ରଧାନଙ୍କୁ ବିଜେଡି ପ୍ରାର୍ଥୀ କରିଛି । ୨୦୧୪ ନିର୍ବାଚନରେ ଏହି ଆସନରୁ ନଗେନ୍ଦ୍ର ପ୍ରଧାନ ବିଜେଡି ପ୍ରାର୍ଥୀ ହୋଇଥିଲେ । ସେହିପରି ଭଦ୍ରକ ଲୋକସଭା ଆସନରେ ଗତ ନିର୍ବାଚନରେ ଅର୍ଜୁନ ଚରଣ ସେଠୀଙ୍କୁ ବିଜେଡି ପ୍ରାର୍ଥୀ କରିଥିବା ବେଳେ ଏଥର ମଞ୍ଜୁଲତା ମଣ୍ଡଳଙ୍କୁ ମିଳିଛି ଶଙ୍ଖ ଟିକେଟ୍ । ସେପଟେ ମୟୂରଭଞ୍ଜ ଲୋକସଭା ଆସନରେ ମଧ୍ୟ ଏଥର ପ୍ରାର୍ଥୀ ବଦଳାଇଛି ଦଳ । ଗତ ନିର୍ବାଚନରେ ଦଳ ରାମଚନ୍ଦ୍ର ହାସଁଦାଙ୍କୁ ପ୍ରାର୍ଥୀ କରିଥିବା ବେଳେ ଏଥର ଦେବାଶିଷ ମାରାଣ୍ଡିଙ୍କୁ ମିଳିଛି ଶଙ୍ଖ ଟିକେଟ୍ ।