ମାଟି ଖୋଳୁ ଖୋଳୁ ବାହାରିଲା ୪୫୦ କିଲୋଗ୍ରାମର ବମ୍ । ତାଜୁବ ହୋଇଗଲେ ଲୋକେ, ସ୍ଥାନୀୟ ଅଞ୍ଚଳରେ ଖେଳିଗଲା ଭୟର ଆତଙ୍କ
ମାଟି ଖୋଳୁ ଖୋଳୁ ମହାଦେବ ବାହାରିବା ଭଳି କୋଲକାତାରେ ମାଟି ଖୋଳୁ ଖୋଳୁ ଅଚାନକ ୪୫୦ କିଲୋଗ୍ରାମର ବମ ବାହାରିଛି । ଏତେ ଓଜନର ବମ ମିଳିବା ଖବର ସାମ୍ନାକୁ ଆସିବା ପରେ ପୂରା ଅଞ୍ଚଳରେ ଆତଙ୍କ ଖେଳିଯାଇଛି । ବମ ମିଳିଥିବା ସ୍ଥାନକୁ ଘେରାବନ୍ଦୀ କରିବା ସହ ସେଠାକୁ ସାଧାରଣ ଲୋକଙ୍କ ପ୍ରବେଶକୁ ବାରଣ କରାଯାଇଛି । ଏହି ବମଟି କୋଲକାତାର ବନ୍ଦର ନିକଟରେ ଦେଖିବାକୁ ମିଳିଛି । ଫାଇଟର ଜେଟରେ ବ୍ୟବହାର ହେଉଥିବା ଏହି ବମ ଦ୍ୱିତୀୟ ବିଶ୍ୱଯୁଦ୍ଧ ସମୟର ବୋଲି କୁହାଯାଉଛି ।
Kanak News is now on WhatsApp
Join and get latest news updates delivered to you via WhatsApp
କୋଲକାତା ବନ୍ଦର ଟ୍ରଷ୍ଟ ଅଧ୍ୟକ୍ଷ ବିନୀତ କୁମାରଙ୍କ କହିବା ଅନୁଯାୟୀ, ଏହି ବମ ମିଳିବା ସଙ୍ଗେ ସଙ୍ଗେ ପୋଲିସ, ନୌସେନା ଓ ସେନାକୁ ସୂଚିତ କରାଯାଇଛି । ପ୍ରଥମେ ଏହା ଟରପିଡୋ ବୋଲି କୁହାଯାଉଥିଲା କିନ୍ତୁ ନୌସେନା ଏହାକୁ ବମ ବୋଲି ସ୍ପଷ୍ଟ କରିଥିଲା । ୪.୫ ମିଟର ଲମ୍ବର ଏହି ବମକୁ ନେଇ ପଶ୍ଚିମବଙ୍ଗର ନୌସେନା କମାଣ୍ଡର ସୁପ୍ରଭୋ କେ ଦେଙ୍କ କହିଛନ୍ତି, ଏହି ବମ କୌଣସି ବିପଦ ସୃଷ୍ଟି କରିବ ନାହିଁ କାରଣ ଏଥିରେ କିଛି ସୁରକ୍ଷା ଲକ୍ ପଡିଛି । ଯାହାକୁ ଫିଟାଇବା ବେଶ କଷ୍ଟକର ।
ରିପୋର୍ଟ ଅନୁଯାୟୀ, ଏହି ବମ ବିଷୟରେ ଅଧିକ ଜାଣିବା ପାଇଁ ଗୋଳାବାରୁଦା କାରଖାନାର ସହାୟତା ନିଆଯିବ । ଯଦି ଆବଶ୍ୟକ ପଡେ ତେବେ ଭାଇଜାକ ନୌସେନା ଘାଟିକୁ ମଧ୍ୟ ସହାୟତା ପାଇଁ ସୂଚିତ କରାଯିବ ବୋଲି ସୁପ୍ରଭୋ ଦେ କହିଛନ୍ତି । ସୂଚନା ଅନୁଯାୟୀ, ହୁଗଲୀ ନଦୀର ପୂର୍ବତଟରେ ଅବସ୍ଥିତ ବନ୍ଦରକୁ ଦ୍ୱିତୀୟ ବିଶ୍ୱଯୁଦ୍ଧ ସମୟରେ ଆମେରିକା ନୌସେନା ଯୁଦ୍ଧ ଅଭିଯାନ ପାଇଁ ବହୁଳ ଭାବରେ ବ୍ୟବହାର କରୁଥିଲା ।