ଧଳା କୁର୍ତାରେ କଳା ଛିଟା : କୋଟି କୋଟିର ଡିଲ୍ ବେଳେ ଧରାପଡିଲେ ଶାସକ ଦଳର ୪ ବିଧାୟକ
କନକ ବ୍ୟୁରୋ : ୧୬ ବର୍ଷ ଧରି ଓଡିଶାକୁ ଶାସନ କରୁଥିବା ନବୀନ ପଟନାୟକଙ୍କ ଧଳାକୁର୍ତାରେ ଲାଗିଛି ଦୁର୍ନୀତିର ଛିଟା । କ୍ୟାମେରାରେ କଏଦ ହୋଇଛି ବିଜେଡିର ଚାରି-ଚାରି ଜଣ ବିଧାୟକଙ୍କ କୋଟିକୋଟି ଟଂକାର ଅସାଧୁ ଡିଲ୍ । ଶିଳ୍ପ ପ୍ରତିଷ୍ଠା ପାଇଁ ଏନ୍ଓସି କରାଇଦେବାକୁ ଟଂକା ମାଗୁଥିଲେ ବିଧାୟକ । ଆଉ ସେହି ସମୟର ଚିତ୍ର କଏଦ ହୋଇଛି କ୍ୟାମେରାରେ । ସେମାନେ ହେଉଛନ୍ତି ହିନ୍ଦୋଳ ବିଧାୟିକା ସୀମାରାଣୀ ନାୟକ, ଛେଣ୍ଡିପଦା ବିଧାୟକ ସୁଶାନ୍ତ ବେହେରା, କରଂଜିଆ ବିଧାୟକ ବିଜୟ ନାୟକ ଓ ଭବାନୀପାଟଣା ବିଧାୟକ ଅନାମ ନାୟକ।
Kanak News is now on WhatsApp
Join and get latest news updates delivered to you via WhatsApp
ଶିଳ୍ପପତି କହି ଜଣେ ବ୍ୟକ୍ତି ତାଙ୍କ ଜିଲ୍ଲାରେ ଏକ ବୟନଶିଳ୍ପ ଖୋଲିବା ପାଇଁ ବିଧାୟିକା ସୀମାରାଣୀ ନାୟକଙ୍କ ସହାୟତା ମାଗିଥିଲେ । ଆଉ ବିଧାୟିକା ବି ଏନଓସି ଦେବାରେ ସହାୟତା କରିବାକୁ ପ୍ରତିଶ୍ରୁତି ଦେଲେ । କିନ୍ତୁ ଏଥିପାଇଁ ଟଙ୍କା ମାଗିଥିଲେ ସୀମାରାଣୀ । ଆଉ ୪୦ କୋଟିର ଡିଲ୍ ହୋଇଥିଲା । ଯାହା କଏଦ ହୋଇଥିଲା କ୍ୟାମେରାରେ । ତେବେ ନିଜ ସଫେଇରେ ସୀମାରାଣୀ ଏହାକୁ ସ୍ୱୀକାର କରିଛନ୍ତି ଆଉ କହିଛନ୍ତି ସେ ମଜାରେ ଟଙ୍କା ମାଗିଥିଲେ । ଦେଖନ୍ତୁ ଏହି ଭିଡିଓ ।
ସେହିପରି ଛେଣ୍ଡିପଦାର ଲୋକପ୍ରିୟ ନେତା ସୁଶାନ୍ତ ବେହେରାଙ୍କ କଳା କାହାଣୀ ମଧ୍ୟ କଏଦ ହୋଇଛି କ୍ୟାମେରାରେ । ଅନୁଗୁଳ ଜିଲ୍ଲାରେ ଏକ ପାୱାର ପ୍ଲାଂଟ ପାଇଁ କିଛି ବ୍ୟକ୍ତି ପହଂଚିଥିଲେ ବିଧାୟକଙ୍କ ପାଖରେ । କଥାବାର୍ତ୍ତା ଆରମ୍ଭ ହେଲା ଏବଂ ଏନଓସିରେ ସହାୟତା କରିବା ପାଇଁ ଆରମ୍ଭ ହେଲା ଟଙ୍କା ମୁଲଚାଲ । ବିଧାୟକ କହିଥିଲେ ୧୦ କୋଟି ଟଙ୍କା ହେଲେ କାମ ହୋଇଯିବ । ଦେଖନ୍ତୁ ସୁଶାନ୍ତ ବେହେରାଙ୍କ ମୁଲଚାଲର ଭିଡିଓ ।
ପଛୁଆ ମୟୂରଭଂଜ ଜିଲ୍ଲାର ଜଣେ ଉଦୀୟମାନ ରାଜନେତା ଭାବେ ଧିରେ ଧିରେ ଚର୍ଚ୍ଚାକୁ ଆସୁଥିଲେ ବିଜେଡିର ଯୁବ ନେତା ବିଜୟ ନାୟକ । କିନ୍ତୁ କ୍ୟାମେରା ତାଙ୍କ ସବୁ ପୋଲ୍ ଖୋଲି ଦେଇଛି । କରଂଜିଆରେ ଶିଳ୍ପପ୍ରତିଷ୍ଠା କରିବାକୁ ହେଲେ ବାବୁ ବିଜୟ ନାୟକଙ୍କୁ ଧରିବାକୁ ପଡିବ । ଆଉ ବିଜୟ ବାବାଙ୍କୁ ବଟି ଦେଲେ ଯାଇ ଶିଳ୍ପସଂସ୍ଥାକୁ ଏନଓସି ମିଳିପାରିବ । ଦେଖନ୍ତୁ ଏହି ଭିଡିଓ କ୍ଲିପ୍ ।
ବିଧାୟକଙ୍କ ଦାବି ହେଉଛି ଏନଓସି ପାଇଁ ଦରକାର ୫ କୋଟି । ନିଜକୁ ଶିଳ୍ପପତି କହି ଜଣେ ବ୍ୟକ୍ତି ବିଧାୟକଙ୍କୁ ୫ କୋଟି ଦେବାକୁ ପ୍ରତିଶ୍ରୁତି ଦେଉଛନ୍ତି । ଆଉ ଏସବୁ କଏଦ ହୋଇ ଯାଇଛି କ୍ୟାମେରାରେ ।
ସେହିପରି ଆଉ ଜଣେ ବିଧାୟକ ହେଉଛନ୍ତି ଭବାନୀପାଟଣାର ଅନାମ ନାୟକ । ଜଣେ ଟାଣୁଆ ନେତା ଏବଂ ଜଣେ ଭଲ ସଂଗଠକ ଭାବେ ବି ଜଣାଶୁଣା। କିନ୍ତୁ ଜିଲ୍ଲାରେ ଶିଳ୍ପପ୍ରତିଷ୍ଠା କରିବାକୁ ହେଲେ ବିଧାୟକ ବାବୁଙ୍କ ପକେଟ୍ ଗରମ୍ ହେବା ଦରକାର । ଶିଳ୍ପପତି ସାଜି ଜଣେ ବ୍ୟକ୍ତି ଅନାମ ବାବୁଙ୍କ ପାଖକୁ ଯାଇଥିବାବେଳେ ବିଧାୟକ କହିଥିଲେ , ସ୍ଥାନୀୟ ନେତାଙ୍କୁ ନପଚାରିଲେ କାମ ହୋଇପାରିବନି।
ସ୍ୱଚ୍ଛ ଓ ନିର୍ମଳ ସରକାରର ଏମାନେ ହେଉଛନ୍ତି ଜଣେ ଜଣେ ଉଦାହରଣ । ଉପରେ କଣ କୁହାଯାଉଛି ଓ ଭିତରେ କଣ ଚାଲିଛି ଏସବୁ ତାର ଗୋଟିଏ ଗୋଟିଏ ପ୍ରମାଣ ।
ଏହି ଅପରେସନ୍ ବ୍ଲାକ୍ ସ୍ପଟର ଭିଡିଓ ଉତୋଳନ କରିଥିଲା ଲିକିଙ୍ଗ ଡଟ୍ ଇନ୍ ନାମକ ଏକ ଘରୋଇ ସଂସ୍ଥା। ନିଜକୁ ଶିଳ୍ପପତି କହି କିଛି ବ୍ୟକ୍ତି ବିଧାୟକ ମାନଙ୍କ ସହ ମୂଲଚାଲ କରିଥିଲେ । ଶିଳ୍ପ ପାଇଁ ଏନଓସି କରାଇଦେବାକୁ ସେମାନେ ସହାୟତା ମାଗିଥିଲେ । ହେଲେ ଏହା ବଦଳରେ ମୋଟା ଅଂକର ଟଂକା ଦାବି କରିଥିଲେ ଏହି ବିଧାୟକ ମାନେ । ଆଉ କ୍ୟାମେରାରେ ରେକର୍ଡ ହୋଇଥିଲା ସବୁ ଦୃଶ୍ୟ ।