ଟ୍ରେନରେ କଟିଗଲେ ଗଜରାଜ ! ଝାରୁସୁଗୁଡାର ବାଗଡିହି ରେଞ୍ଜରେ ବଡ ଅଘଟଣ, ରେଳଧାରଣା ପାର ହେଉଥିବାବେଳେ ଟ୍ରେନ ଧକ୍କାରେ ୪ ହାତୀ ମୃତ
କନକ ବ୍ୟୁରୋ : ଝାରୁସୁଗୁଡା ଜିଲ୍ଲା ବାଗଡିହି ରେଞ୍ଜ ତେଲ୍ଡିହି ଓ ଅଗରିଆ ବାଗଡିହି ରେଳଧାରଣାରେ କଟି ୪ଟି ହାତୀ ପ୍ରାଣ ହରାଇଛନ୍ତି । ଭୋର ୪ଟାରେ ଏହି ଦୁର୍ଘଟଣା ହୋଇଛି । ମୃତ ୪ଟି ହାତୀ ମଧ୍ୟରେ ୨ଟି ଛୁଆ ଓ ୨ଟି ବଡ ହାତୀ ଅଛନ୍ତି । ଏହି ହାତୀ ରେଳଧାରଣା ପାର କରୁଥିବା ବେଳେ ଦୁର୍ଘଟଣା ଘଟିଛି । ଘଟଣାସ୍ଥଳରେ ବାଗଡିହି ରେଞ୍ଜ ଅଧିକାରୀ ଓ କର୍ମଚାରୀ ପହଂଚିଛନ୍ତି । ମୃତଦେହଗୁଡିକୁ ରେଳଧାରଣାରୁ ବାହାର କରିବା ପରେ ସଂପୃକ୍ତ ରୁଟରେ ରେଳଚଳାଚଳ ସ୍ୱାଭାବିକ ହୋଇଛି । ପ୍ରଶ୍ନ ଉଠୁଛି , ଏଥିପାଇଁ ଦାୟୀ କିଏ । ସଂପୃକ୍ତ ଅଚଂଳରେ ହାତୀ ଯିବାଆସିବା କରୁଥିବାବେଳେ ଏ ନେଇ ସତର୍କ ନଥିଲେ କି ରେଳ କର୍ତୃପକ୍ଷ ।
Kanak News is now on WhatsApp
Join and get latest news updates delivered to you via WhatsApp
ସୂଚନାଯୋଗ୍ୟ ଯେ ଗତ ୨୦୧୨ ମସିହାରେ ମଧ୍ୟ ଗଞ୍ଜାମ ଜିଲ୍ଲା ରମ୍ଭା ନିକଟରେ ରେଳ ଲାଇନ ପାର ହେଉଥିବା ବେଳେ ଟ୍ରେନରେ କଟି ୬ଟି ହାତୀଙ୍କର ମୃତ୍ୟୁ ଘଟିଥିଲା। ସେତେବେଳେ ଟ୍ରେନ୍ରେ ଯେମିତି ହାତୀ କଟି ମୃତ୍ୟୁ ବରଣ ନ କରନ୍ତି ସେଥିପାଇଁ ରେଳବାଇ ଓ ବନ ବିଭାଗ ମଧ୍ୟରେ ସମନ୍ଵୟ ରକ୍ଷା କରାଯାଇ ପଦକ୍ଷେପ ଗ୍ରହଣ କରାଯିବ ବୋଲି ନିଷ୍ପତି ହୋଇଥିଲା। ଏହା ସତ୍ତ୍ୱେ ଟ୍ରେନରେ କଟି ୪ଟି ହାତୀଙ୍କର ମୃତ୍ୟୁ ଘଟିବା ଘଟଣା ବୁଦ୍ଧିଜୀବୀ ମହଲରେ ଗଭୀର ଉଦବେଗ ସୃଷ୍ଟି କରିଛି।
ଏହି ସମୟରେ ହାଓ୍ଵଡ଼ା- ମୁମ୍ବାଇ ଏକ୍ସପ୍ରେସ ଓ କେତୋଟି ମାଲଗାଡ଼ି ଏହି ରେଲଲାଇନ ଦେଇ ଅତିକ୍ରମ କରିଛି। ମାତ୍ର କୌଣସି ଟ୍ରେନ୍ ହାତୀ କଟିଥିବା ନେଇ ନିକଟସ୍ଥ ଷ୍ଟେସନରେ ରିପୋର୍ଟ କରି ନ ଥିବା ଜଣାଯାଇଛି। ଖବର ପାଇ ବରିଷ୍ଟ ବନ ଅଧିକାରୀ ଓ ରେଳବାଇର ଅଧିକାରୀମାନେ ପହଞ୍ଚି ଘଟଣାର ତଦନ୍ତ ଆରମ୍ଭ କରିଛନ୍ତି।