କେଜରିୱାଲଙ୍କୁ ୪ ମୁଖ୍ୟମନ୍ତ୍ରୀଙ୍କ ସମର୍ଥନ । ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲଙ୍କ ଗତ ସାତ ଦିନ ଧରି ଚାଲିଥିବା ଧାରଣାକୁ ସମର୍ଥନ କରିଛନ୍ତି ଦେଶର ୪ ଜଣ ମୁଖ୍ୟମନ୍ତ୍ରୀ । ଅରବିନ୍ଦଙ୍କୁ ସମର୍ଥନ ଜଣାଇ ଶନିବାର ଦିଲ୍ଲୀରେ ପହଂଚିଥିଲେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ, ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାଇଡୁ, କେରଳ ମୁଖ୍ୟମନ୍ତ୍ରୀ ପିନାରାଇ ବିଜୟନ ଓ କର୍ଣ୍ଣାଟକ ମୁଖ୍ୟମନ୍ତ୍ରୀ ଏଚ.ଡି. କୁମାରସ୍ୱାମୀ । ଏହି ନେତାମାନେ ଉପରାଜ୍ୟପାଳଙ୍କ ପ୍ରତୀକ୍ଷାଳୟରେ ଧାରଣାରେ ବସିଥିବା ମୁଖ୍ୟମନ୍ତ୍ରୀ କେଜରିୱାଲଙ୍କୁ ଭେଟିବାକୁ ଚାହିଁ ଥିଲେ ମଧ୍ୟ ସେମାନଙ୍କୁ ଅନୁମତି ମିଳି ନଥିଲା । ଏପରିକି ଦିଲ୍ଲୀ ଉପରାଜ୍ୟପାଳଙ୍କୁ ଭେଟିବା ପାଇଁ ଲିଖିତ ଅନୁମତି ମାଗିଥିଲେ ମଧ୍ୟ ଏହା ମିଳିପାରି ନଥିଲା । ଏହି ୪ ମୁଖ୍ୟମନ୍ତ୍ରୀ ଏକ ସାମ୍ବାଦିକ ସମ୍ମିଳନୀରେ ଦିଲ୍ଲୀରେ ସୃଷ୍ଟି ହୋଇଥିବା ସମସ୍ୟାର ସମାଧାନ କରିବାକୁ ଉଭୟ କେନ୍ଦ୍ର ସରକାର ଓ ଦିଲ୍ଲୀ ଉପରାଜ୍ୟପାଳଙ୍କୁ ଦାବି କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଦିଲ୍ଲୀରେ ଏବେ ସାମ୍ବିଧାନିକ ସଂକଟ ସୃଷ୍ଟି ହୋଇଛି ବୋଲି କହିଛନ୍ତି ପଶ୍ଚିମ ବଙ୍ଗ ମୁଖ୍ୟମନ୍ତ୍ରୀ ତଥା ଟିଏମସି ମୁଖ୍ୟ ମମତା ବାନାର୍ଜୀ । ଏହାର ପରିଣାମ ସାଧାରଣ ଲୋକ ହିଁ ଭୋଗୁ ଥିବା ସେ ଅଭିଯୋଗ କରିଛନ୍ତି । ଏହା ସହ ରାଜନୀତିକୁ ନିର୍ବାଚିତ ସରକାର ସହ ନ ଯୋଡିବାକୁ ମମତା ଆହ୍ୱାନ ଦେଇଛନ୍ତି । ଲୋକଙ୍କ ସ୍ୱାର୍ଥ ପାଇଁ ଦିଲ୍ଲୀରେ ସୃଷ୍ଟିରେ ସମସ୍ୟାର ତୁରନ୍ତ ସମାଧାନ ପାଇଁ ୪ ଜଣ ମୁଖ୍ୟମନ୍ତ୍ରୀ ଦାବି କରିଛନ୍ତି । ଆସନ୍ତା ୨୦୧୯ ନିର୍ବାଚନରେ ମୋଦି ସରକାରଙ୍କୁ କଡା ଟକ୍କର ଦେବା ପାଇଁ ତୃତୀୟ ସାମୁଖ୍ୟର ଉତଥାନ ହେବା ସୁନିଶ୍ଚିତ ବୋଲି ଆକଳନ କରୁଛନ୍ତି ବିଶେଷଜ୍ଞ । ଅରବିନ୍ଦଙ୍କ ସମର୍ଥନରେ ୪ ମୁଖ୍ୟମନ୍ତ୍ରୀ ସାମିଲ ହେବା ଏହାର ଝଲକ ବୋଲି କୁହାଯାଉଛି । ଏହି ମେଂଟ ମୋଦି ସରକାରଙ୍କ ଉପରେ ଚାପ ସୃଷ୍ଟି କରିବ ବୋଲି କୁହାଯାଉଛି । ଅରବିନ୍ଦଙ୍କୁ ଡିଏମକେ ନେତା ଷ୍ଟାଲିନ, ଗୁଜରାଟର ପଟିଦାର ନେତା ହାର୍ଦିକ ପଟେଲ, ଆରଜେଡି, ଆରଏଲଡି ସମେତ ବହୁ ଦଳ ଖୋଲାଖୋଲି ସମର୍ଥନ ଘୋଷଣା କରିଛନ୍ତି । ପୂର୍ବରୁ କର୍ଣ୍ଣାଟକରେ କୁମାରସ୍ୱାମୀଙ୍କ ଶପଥ ଉତ୍ସବରେ ସବୁ ବିରୋଧୀ ନେତା ଏକାଠି ହୋଇଥିଲେ ଏବଂ ମୋଦି ସରକାରଙ୍କ ପାଇଁ ଚିନ୍ତା ବଢାଇଥିଲେ । ଏପଟେ ଦିଲ୍ଲୀ ମୁଖ୍ୟମନ୍ତ୍ରୀଙ୍କ ଧାରଣା ସମସ୍ତ ବିରୋଧୀଙ୍କୁ ପୁଣି ଥରେ ଏକାଠି ହେବାର ସୁଯୋଗ ସୃଷ୍ଟି କରିଛି ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ଦିଲ୍ଲୀ ଉପରାଜ୍ୟପାଳ ଅନୀଲ ବୈଜଲଙ୍କ ବିରୋଧରେ ବଡଧରଣର ଆନ୍ଦୋଳନ କରିବା ପାଇଁ ଘୋଷଣା କରିଛି ଆମ ଆଦମୀ ପାର୍ଟି । ଆଜି ଦଳ ପକ୍ଷରୁ ପିଏମଓ ଅଫିସ ଘେରାଉ କରାଯିବାର ଯୋଜନା ରହିଛି । କେଜରିୱାଲଙ୍କ ଆନ୍ଦୋଳନ ସପ୍ତମ ଦିନରେ ପହଂଚିଥିବାବେଳେ ପରବର୍ତୀ ରଣନୀତି ନେଇ ପୂର୍ବରୁ ବୈଠକ ବସିଥିଲା । କେଜରିୱାଲଙ୍କ ବାସଭବନରେ ବସିଥିବା ବୈଠକରେ ଆମ ଆଦମୀ ପାର୍ଟିର ବହୁନେତା ଯୋଗ ଦେଇ ରବିବାର ହେବାକୁ ଥିବା ଆନ୍ଦୋଳନକୁ କିଭଳି ସଫଳ କରାଯାଇପାରିବ ତା ଉପରେ ଚର୍ଚ୍ଚା କରିଥିଲେ । ୩ଟି ପ୍ରମୁଖ ଦାବି ଦେଇ କେଜରିୱାଲଙ୍କ ସମେତ ୩ଜଣ ମନ୍ତ୍ରୀ ଅନଶନରେ ବସିଛନ୍ତି ।