ତାରିଖ୍ ପେ ତାରିଖ୍ ! କୋର୍ଟରେ ଗଡୁଛି କୋଟି କୋଟି ବିଚାରଧୀନ ମାମଲା, ଫୈସଲା କରିବାକୁ ନାହାନ୍ତି ଆବଶ୍ୟକୀୟ ବିଚାରପତି?
କନକ ବ୍ୟୁରୋ : ତାରିଖ୍ ପେ ତାରିଖ । ତାରିଖ ପେ ତାରିଖ୍ ମିଳତି ରହି ହେ । ବଲିଉଡ ଫିଲ୍ମ ଦାମିନୀରେ ସନ୍ନି ଦେଓଲଙ୍କ ଏହି ଡାଇଲଗ କିଏ ବା ନ ଜାଣିଛି । ସନ୍ନି ଦେଓଲଙ୍କ ଏହି ଫିଲ୍ମ ଡାଇଲଗ ଏବେ ଦେଶରେ ବାସ୍ତବରେ ସତ ପ୍ରମାଣିତ ହେବାକୁ ଯାଉଛି । ଯେତେବେଳେ ବହୁଚର୍ଚ୍ଚିତ ଅଯୋଧ୍ୟା ମାମଲାର ରାୟ ଆସିବା ବଦଳରେ ଆସୁଛି କେବଳ ତାରିଖ୍ । ୨୯ ଜାନୁଆରୀରେ ସୁପ୍ରିମକୋର୍ଟରେ ଅଯୋଧ୍ୟା ମାମଲାର ଶୁଣାଣି ହେବାକୁ ସ୍ଥିର ହୋଇଥିବା ବେଳେ ଜଣେ ବିଚାରପତି ଅନୁପସ୍ଥିତ ରହିବା କାରଣରୁ ଏହି ମାମଲାର ଶୁଣାଣିକୁ ଆଗାମୀ ତାରିଖକୁ ଘୁଞ୍ଚାଇ ଦିଆଯାଇଛି ।
Kanak News is now on WhatsApp
Join and get latest news updates delivered to you via WhatsApp
କେବଳ ଅଯୋଧ୍ୟା ମାମଲା ନୁହେଁ ନ୍ୟାୟ ପାଇବା ଆଶାରେ କୋର୍ଟର ଚକ୍କର କାଟୁଥିବା ଲୋକ ଜାଣିଛି ବିଚାରପିତ ଦେଉଥିବା ତାରିଖ କେତେ କଷ୍ଟ ଦିଏ । କେବଳ ଅଯୋଧ୍ୟା ମାମଲା ନୁହେଁ ଦେଶରେ ଏହିଭଳି ଭାବେ ବର୍ଷ ବର୍ଷ ଧରି ଗଡି ଆସୁଛି ଅନେକ ମାମଲା । ଯେଉଁଥିପାଇଁ ଅଧିକାଂଶ ସମୟରେ ଅଭିଯୋଗକାରୀ ନ୍ୟାୟ ପାଇବାକୁ ବର୍ଷ ବର୍ଷ ଧରି ଅପେକ୍ଷା କରୁଛି ତ ପୁଣି କେତେବେଳେ ଦୋଷୀ ସାବ୍ୟସ୍ତ ନ ହୋଇ ମଧ୍ୟ କେବଳ ଅଭିଯୋଗ ଆଧାରରେ ଜେଲର ଚାରିକାନ୍ଥ ମଧ୍ୟରେ ସଜା କାଟୁଛନ୍ତି ଅନେକ ନିର୍ଦ୍ଦୋଷ ।
ନ୍ୟାୟ ପାଇବା କ୍ଷେତ୍ରରେ ଦେଶରେ ଏଭଳି ସ୍ଥିତି କାହିଁକି ଉପୁଜିଛି ? ସାଧାରଣ ଲୋକଟିର ମନରେ ଏଭଳି ପ୍ରଶ୍ନ ଉଠିବା ମଧ୍ୟ ସ୍ୱାଭାବିକ । ତେବେ ଏହାର ଉତ୍ତର ହେଉଛି ଦେଶର ବିଭିନ୍ନ କୋର୍ଟରେ ବିଚାରପତିଙ୍କ ଅଭାବ ଓ ବର୍ଷ ବର୍ଷ ଧରି ଗଡି ଆସୁଥିବା ବିଚାରଧୀନ ମାମଲା । ବରିଷ୍ଠ ସାମ୍ବାଦିକ କାଞ୍ଚନ ଗୁପ୍ତାଙ୍କ ସୂଚନା ଅନୁଯାୟୀ, ଦେଶରେ ଏବେ ୩ କୋଟି ୪୪ ଲକ୍ଷ ୭୦ ହଜାର ୮୧୭ଟି କେସ ପେଣ୍ଡିଂ ବା ବିଚାରଧୀନ ରହିଛି । ସେଥିମଧ୍ୟରୁ କେବଳ ସୁପ୍ରିମକୋର୍ଟରେ ୫୭ ହଜାର ୩୪୬ଟି ମାମଲା ବିଚାରଧୀନ ରହିଥିବା ବେଳେ ଦେଶରେ ଥିବା ହାଇକୋର୍ଟ ଓ ଜିଲ୍ଲା ଏବଂ ନିମ୍ନ ଅଦାଲତରେ ଯଥାକ୍ରମେ ୪୭ ଲକ୍ଷ ୧୯ ହଜାର ୪୮୩ ଓ ୨ କୋଟି ୯୬ ଲକ୍ଷ ୯୩ ହଜାର ୯୮୮ଟି ମାମଲା ବିଚାରଧୀନ ରହିଛି । ଆଉ ସବୁଠୁ ବଡ କଥା ହେଲା, ନିମ୍ନ ଅଦାଲତରେ ଥିବା ସବୁ ମାମଲାର ଶୁଣାଣି ଶେଷ କରିବାକୁ ପାଖାପାଖି ୩୨୪ ବର୍ଷ ଲାଗିଯିବ ।
Pending court cases in #India
Supreme Court 57,346
High Courts 47,19,483
Lower courts 2,96,93,988
Total pending 3,44,70,817[As on 28.01.19.] #Judiciary #Justice #ConstitutionalMorality
— Kanchan Gupta (@KanchanGupta) January 28, 2019
କାଞ୍ଚନ ଗୁପ୍ତାଙ୍କ ରିପୋର୍ଟ ଅନୁଯାୟୀ, ଦେଶର ନିମ୍ନ ଅଦାଲତ ଗୁଡିକରେ ୬୦ ଲକ୍ଷ ମାମଲା ୫ ବର୍ଷ ପୁରୁଣା ବିଚାରଧୀନ ମାମଲା ହୋଇଥିବା ବେଳେ ୩୦ ବର୍ଷରୁ ଅଧିକ ସମୟ ଧରି ବିଚାରଧୀନ ରହିଥିବା ମାମଲା ସଂଖ୍ୟା ୬୬ ହଜାର । ସେହିଭଳି ପାଖାପାଖି ୪୫ ବର୍ଷ ପୁରୁଣା ୧୮୦୦ଟି ମାମଲା ବିଚାରଧୀନ ରହିଛି । ଏସବୁ ଭିତରେ ସବୁଠୁ ବଡ କଥା ହେଲା, ସିନିୟର ସିଟିଜେନଙ୍କ ପକ୍ଷରୁ ଦାୟର କରାଯାଇଥିବା ୧୭ ଲକ୍ଷ ୨୪ ହଜାର ୨୪୦ଟି ମାମଲା ଏଯାଏଁ ବିଚାରଧୀନ ରହିଛି । ତେଣୁ ଭାରତରେ ନ୍ୟାୟ ପାଇବାକୁ ଲୋକଙ୍କୁ କେତେ ସଂଘର୍ଷ କରିବାକୁ ପଡୁଛି ତାହା ଏଥିରୁ ସ୍ପଷ୍ଟ ଜଣାପଡୁଛି ।
ଯଦି ଓଡିଶା ଉପରେ ନଜର ପକାଇବା ତେବେ ରାଜ୍ୟରେ ଏବେ ମଧ୍ୟ ୧୧ ଲକ୍ଷ ୫୩ ହଜାର ୯୩୩ଟି ମାମଲା ବିଚାରଧୀନ ରହିଛି । ଯେଉଁଥିରେ ୨୦ରୁ ୩୦ ବର୍ଷ ପୁରୁଣା ୨୭୪୫୯ଟି ମାମଲା ରହିଥିବା ବେଳେ ୩୦ ବର୍ଷରୁ ଅଧିକ ୪୧୦୧ଟି ପୁରୁଣା ମାମଲା ବିଚାରଧୀନ ରହିଛି ।
ଏହାବାଦ୍ ମାମଲା ବିଚାରଧୀନ ରହିବା ପଛରେ କୋର୍ଟ ଗୁଡିକରେ ବିଚାରପତିଙ୍କ ନିଯୁକ୍ତି ଅଭାବ ମଧ୍ୟ ଆଉ ଏକ କାରଣ । ଆଇନ ମନ୍ତ୍ରାଣଳୟର ରିପୋର୍ଟ ଅନୁଯାୟୀ, ଭାରତରେ ୧୦ ଲକ୍ଷ ଲୋକଙ୍କ ପାଇଁ ହାରାହାରି ୧୮ ଜଣ ବିଚାରପତି ନିଯୁକ୍ତ କରାଯାଇଛି । ଯେତେବେଳେ କି ୧୦ ଲକ୍ଷ ଲୋକଙ୍କ ପାଇଁ ବିଚାରପତିଙ୍କ ସଂଖ୍ୟା ୫୦ ରହିବା ଆବଶ୍ୟକ ଲ କମିଶନ ରିପୋର୍ଟରେ କହିଛନ୍ତି ।
ଏସବୁ ଭିତରେ ଦେଶର ହାଇକୋର୍ଟ ଗୁଡିକରେ ବିଚାରପତିଙ୍କ ଘୋର ଅଭାବ ଦେଖିବାକୁ ମିଳିଛି । ଦେଶର ୨୪ଟି ହାଇକୋର୍ଟର ବିଚାରପତିଙ୍କ କଥା କହିବା ତେବେ ଆହ୍ଲାବାଦ ହାଇକୋର୍ଟରେ ୧୬୦ ଜଣ ବିଚାରପତିଙ୍କ ଆବଶ୍ୟକତା ଥିବା ବେଳେ ଏଠାରେ ଆହୁରି ୫୦ଟି ଆସନ ଖାଲି ପଡିଛି । ସେହିଭଳି ଓଡିଶା ହାଇକୋର୍ଟରେ ୨୭ ଜଣ ବିଚାରପତିଙ୍କ ଆବଶ୍ୟକତା ଥିବା ବେଳେ ୧୪ ଜଣ ବିଚାରପତି ନିଯୁକ୍ତି ପାଇଛନ୍ତି । ଏହି ହିସାବରେ ଦେଖିବାକୁ ଗଲେ ଦେଶରେ ଥିବା ୨୪ଟି ହାଇକୋର୍ଟରେ ୧୦୭୯ ଜଣ ବିଚାରପତିଙ୍କର ଆବଶ୍ୟକତା ରହିଥିବା ବେଳେ ୬୯୫ ଜଣ ଏବେ କାର୍ଯ୍ୟ କରୁଛନ୍ତି । ଆହୁରି ୩୮୪ଟି ଆସନରେ କୌଣସି ବିଚାରପତି ଏଯାଏଁ ନିଯୁକ୍ତି ପାଇନାହାନ୍ତି । ଆଉ ବିଚାରପତିଙ୍କ ଅଭାବ ଯୋଗୁଁ ଦେଶରେ ବର୍ଷ ବର୍ଷ ଧରି ମାମଲା ଗଡି ଚାଲିଛି ଓ ନ୍ୟାୟ ପାଇବାକୁ ସାଧାରଣ ଲୋକଙ୍କୁ ବର୍ଷ ବର୍ଷ ଧରି କରିବାକୁ ପଡୁଛି ଅପେକ୍ଷା ।