ଛାତ୍ରଛାତ୍ରୀଙ୍କ କ୍ୟାରିୟର ସହ ସାଂଘାତିକ ଖେଳ । ଖାତାରେ ଉତ୍ତର ମିଶିଗଲା ବୋଲି, ୩୨୦୦ ପିଲାଙ୍କୁ ମିିଳିଲା ଶୂନ ମାର୍କ । ବୋର୍ଡ ବିରୋଧରେ ରାଜରାସ୍ତାକୁ ଓହ୍ଲାଇବାକୁ ସଜବାଜ ହେଉଛନ୍ତି ଡିପ୍ଲୋମା ପରିକ୍ଷାର୍ଥୀ
କନକ ବ୍ୟୁରୋ : ଛାତ୍ରଛାତ୍ରୀଙ୍କ କ୍ୟାରିୟର ସହ ସାଂଘାତିକ ଖେଳ । ରାଜ୍ୟର ଆଇଆଣ୍ଡଏମ ଅଥାର୍ତ ଏଣ୍ଟରପ୍ରେନ୍ୟୁରସିପ୍ ଆଣ୍ଡ୍ ମ୍ୟାନେଜମେଣ୍ଟ ବିଷୟରେ ପରୀକ୍ଷା ଦେଇଥିବା ଡିପ୍ଲୋମାର ଶେଷ ବର୍ଷ ସମସ୍ତ ଛାତ୍ରଛାତ୍ରୀଙ୍କୁ ଶୂନ ମାର୍କ ମିଳିଛି । ଏହାସହ ଏହି ବିଷୟ ରଖି ପାଠ ପଢ଼ୁଥିବା ସମସ୍ତ ଛାତ୍ରଛାତ୍ରୀ ଫେଲ୍ ହୋଇଛନ୍ତି । ଏହି ବିଷୟରେ ପରୀକ୍ଷା ଦେଇଥିବା ସମସ୍ତ ଛାତ୍ରଛାତ୍ରୀ ଫେଲ ହେବାକୁ ସହଜରେ ଗ୍ରହଣ କରି ପାରୁ ନାହାନ୍ତି ଅଭିଭାବକ ଓ ଛାତ୍ରଛାତ୍ରୀ ।ରାଜ୍ୟର ମୋଟ ୩୨୦୦ ଛାତ୍ରଛାତ୍ରୀ ଏହି ବିଷୟରେ ପରୀକ୍ଷା ଦେଇଥିଲେ ଏବଂ ସମସ୍ତଙ୍କ ନମ୍ବର ଶୂନ ରହିଛି ବୋଲି ଜଣା ପଡିଛି ।
Kanak News is now on WhatsApp
Join and get latest news updates delivered to you via WhatsApp
ଅନ୍ୟପଟେ ରାଜ୍ୟ ବୈଷୟିକ ଶିକ୍ଷା ପ୍ରଶିକ୍ଷଣ ପରିଷଦ କହିଛି ଯେ, ସମସ୍ତ ଛାତ୍ରଛାତ୍ରୀଙ୍କ ଉତ୍ତର ସମାନ ଆସିଥିବାରୁ ସମସ୍ତଙ୍କୁ ଶୂନ ମାର୍କ ଦିଆଯାଇଛି । ବୋର୍ଡର ଏହି ନିଷ୍ପତି ପରେ ଛାତ୍ରଛାତ୍ରୀଙ୍କୁ ଆଉଥରେ ପରୀକ୍ଷା ଦେବାକୁ ପଡିବ । ତାହା ବି ପୁଣି ବର୍ଷେ ପରେ । ଯାହାକୁ ନେଇ ଅଭିଭାବକ ଓ ଛାତ୍ରଛାତ୍ରୀଙ୍କ ମଧ୍ୟରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି । ସବଠୁ ବଡ କଥା ହେଲା, ସବୁ ବିଷୟରେ ୬୦ରୁ ୭୦ ପ୍ରତିଶତ ରଖିଥିବା ଛାତ୍ରଛାତ୍ରୀ କେବଳ ଏହି ଏଣ୍ଟରପ୍ରେନ୍ୟୁରସିପ୍ ଆଣ୍ଡ୍ ମ୍ୟାନେଜମେଣ୍ଟ ବିଷୟରେ ଫେଲ ହୋଇଛନ୍ତି । ଯାହାଫଳରେ ଛାତ୍ରଛାତ୍ରୀଙ୍କୁ ପାସ୍ ହେବାକୁ ଆହୁରି ଗୋଟିଏ ବର୍ଷ ଅପେକ୍ଷା କରିବାକୁ ପଡିବ । ବୋର୍ଡର ଏଭଳି ନିଷ୍ପତି ପରେ ଛାତ୍ରଛାତ୍ରୀଙ୍କ କ୍ୟାରିଅର ଅନ୍ଧାର ଭିତରକୁ ଠେଲି ହୋଇଯାଇଛି । ତେଣୁ ଏହାକୁ ନେଇ ଏବେ ଆନ୍ଦୋଳନ ପାଇଁ ସଜବାଜ ହେଲେଣି ଛାତ୍ରଛାତ୍ରୀ । ଏପରିକି ନୟାଗଡରେ ବୋର୍ଡ଼ର ଏଭଳି ମନମାନିକୁ ନେଇ ପ୍ରତିିବାଦ ଦେଖିବାକୁ ମିଳିଛି । ନୟାଗଡ ଜିଲ୍ଲା ଛାତ୍ର ସଂଘ ପକ୍ଷରୁ ଛାତ୍ରନେତା ଶିବରାମ ମହାପାତ୍ରଙ୍କ ନେତୃତ୍ୱରେ କିଛି ପରୀକ୍ଷାର୍ଥୀ ମଧ୍ୟ ଏନେଇ ଜିଲ୍ଲାପାଳଙ୍କୁ ଦାବିପତ୍ର ଦେଇଛନ୍ତି ।
ଯେଉଁ ଛାତ୍ରଛାତ୍ରୀ ଏନେଇ ଅଭିଯୋଗ କରିବାକୁ ଚାହୁଁଥାନ୍ତି ସେମାନେ ବୋର୍ଡ ପକ୍ଷରୁ ଦିଆଯାଇଥିବା ତାରିଖରେ ସରକାରୀ ପଲିଟେକନିକ, ଚନ୍ଦ୍ରଶେଖରପୁର, ଭୁବନେଶ୍ୱରରେ ନିଜର ଅଭିଯୋଗ ଦାଖଲ କରିପାରିବେ । ଏନେଇ ଏକ ବିଜ୍ଞପ୍ତି ମଧ୍ୟ ଜାରି କରିଛି ବୋର୍ଡ । ତେବେ ୩୨୦୦ ଛାତ୍ରଛାତ୍ରୀଙ୍କର କ୍ୟାରିୟର ବିଷୟ ହୋଇଥିବାରୁ ଏହା ଊପରେ ଯଥାଶୀଘ୍ର ବିଚାର କରିବାକୁ ଦାବି କରିଛନ୍ତି ଛାତ୍ରଛାତ୍ରୀ ।