କିପରି ହେବ ରୋଗୀ ଚିକିତ୍ସା ? ରାଜ୍ୟରେ ୩୧୩୩ ଡାକ୍ତର ପଦବୀ ଖାଲି

48

କନକ ବ୍ୟୁରୋ : ରାଜ୍ୟରେ ସରକାରୀ ଡାକ୍ତରଖାନାରେ ୩୧୩୩ ଡାକ୍ତର ପଦ ଖାଲି ପଡ଼ିଛି । ରାଜ୍ୟର ବିଭିନ୍ନ ଡାକ୍ତରଖାନାରେ ୬୫୩୬ ଡାକ୍ତର ପଦ ରହିଥିବା ବେଳେ ଏଥିରେ ୩୪୦୩ ଡାକ୍ତର ନିଯୁକ୍ତ ରହିଛନ୍ତି । ମୟୂରଭଞ୍ଜ ଜିଲ୍ଲାରେ ସର୍ବାଧିକ ୨୨୪ ଓ ଗଞ୍ଜାମ ଜିଲ୍ଲାରେ ୨୧୬ ଡାକ୍ତର ପଦ ଖାଲି ରହିଛି । ଗତକାଲି ବିଧାନସଭାରେ ବିଭିନ୍ନ ପ୍ରଶ୍ନର ଉତ୍ତରରେ ସ୍ବାସ୍ଥ୍ୟମନ୍ତ୍ରୀ ପ୍ରତାପ ଜେନା ରାଜ୍ୟରେ ଖାଲି ପଡ଼ିଥିବା ଡାକ୍ତର ପଦ ଓ ଏହି ପଦ ପୂରଣ କରିବା ପାଇଁ କେଉଁ ପ୍ରକାର ପଦକ୍ଷେପ ନିଆଯାଉଛି, ତାହା ସୂଚନା ଦେଇଛନ୍ତି ।

ସୂଚନା ଅନୁସାରେ, ଅନୁଗୁଳରେ ୧୦୬, ବାଲେଶ୍ବରରେ ୧୫୨, ବରଗଡ଼ରେ ୧୨୩, ଭଦ୍ରକରେ ୧୦୯, ବଲାଙ୍ଗୀରରେ ୯୫, ବୌଦ୍ଧରେ ୪୪, କଟକରେ ୭୪, ଦେବଗଡ଼ରେ ୪୮, ଢେଙ୍କାନାଳରେ ୧୦୭, ଗଜପତିରେ ୫୮, ଜଗତସିଂହପୁରରେ ୭୬, ଯାଜପୁରରେ ୮୭, ଝାରସୁଗୁଡ଼ାରେ ୪୬, କଳାହାଣ୍ଡିରେ ୧୨୪, କନ୍ଧମାଳରେ ୧୦୪, କେନ୍ଦ୍ରାପଡ଼ାରେ ୧୨୩, ଖୋର୍ଧାରେ ୮୨, କୋରାପୁଟରେ ୧୦୦, ମାଲକାନାଗିରିରେ ୭୨, ନବରଙ୍ଗପୁରରେ ୯୮, ନୟାଗଡ଼ରେ ୧୦୯, ନୂଆପଡ଼ାରେ ୧୨୦, ପୁରୀ ଓ ସମ୍ବଲପୁରରେ ୯୨, ସୋନପୁରରେ ୬୩, ସୁନ୍ଦରଗଡ଼ରେ ୧୬୯, କ୍ୟାପିଟାଲ ହସ୍ପିଟାଲ ଓ ଆରଜିଏଚ୍ ରାଉରକେଲାରେ ୩୮ଟି ଲେଖାଏଁ ଡାକ୍ତର ପଦ ଖାଲି ରହିଛି ।

ସେହିପରି ରାଜ୍ୟର ୭ ମେଡିକାଲ କଲେଜ ଓ ଡେଣ୍ଟାଲ କଲେଜରେ ୫୪ ପ୍ରଫେସର, ୧୦୩ ଆସୋସିଏଟ୍ ପ୍ରଫେସର ଓ ୧୮୨ ଆସିଷ୍ଟାଣ୍ଟ ପ୍ରଫେସର ପଦ ଖାଲି ରହିଛି । ଏସସିବି ମେଡିକାଲ କଲେଜରେ ୬୩ଟି ପ୍ରଫେସର ପଦରୁ ୧୧ଟି ଖାଲି ଥିବା ବେଳେ ୧୦୩ ଆସୋସିଏଟ୍ ପ୍ରଫେସର ପଦରୁ ୨୫ଟି ଖାଲି ପଡ଼ିଛି । ଏହାସହ ୨୧୪ ଆସିଷ୍ଟାଣ୍ଟ ପ୍ରଫେସର୍ ପଦରୁ ୭୪ ଖାଲି ରହିଛି । ବ୍ରହ୍ମପୁରସ୍ଥିତ ଏମ୍କେସିଜି ମେଡିକାଲ କଲେଜରେ ୩୭ ପ୍ରଫେସର ପଦରୁ ୮, ୭୯ ଆସୋସିଏଟ୍ ପ୍ରଫେସର ପଦରୁ ୧୮ ଓ ୧୬୦ ଆସିଷ୍ଟାଣ୍ଟ ପ୍ରଫେସର ପଦରୁ ୨୫ ଖାଲି ପଡ଼ିଛି । ଭୀମସାର ବୁର୍ଲାରେ ୧୨ ପ୍ରଫେସର, ୧୬ ଆସୋସିଏଟ୍ ପ୍ରଫେସର ଓ ୩୮ ଆସିଷ୍ଟାଣ୍ଟ ପ୍ରଫେସର, ଏସସିବି ଡେଣ୍ଟାଲ କଲେଜରେ ୨ ଆସୋସିଏଟ୍ ପ୍ରଫେସର, ୬ ଆସିଷ୍ଟାଣ୍ଟ ପ୍ରଫେସର, ବାରିପଦା ମେଡିକାଲ କଲେଜରେ ୮ ପ୍ରଫେସର, ୧୨ ଆସୋସିଏଟ୍ ପ୍ରଫେସର ଓ ୧୧ ଆସିଷ୍ଟାଣ୍ଟ ପ୍ରଫେସର, କୋରାପୁଟ ମେଡିକାଲ କଲେଜରେ ୩ ପ୍ରଫେସର, ୮ ଆସୋସିଏଟ ପ୍ରଫେସର ଓ ୫ ଆସିଷ୍ଟାଣ୍ଟ ପ୍ରଫେସର, ବାଲେଶ୍ବର ମେଡିକାଲ କଲେଜରେ ୪ ପ୍ରଫେସର, ୧୦ ଆସୋସିଏଟ୍ ପ୍ରଫେସର ଓ ୧୨ ଆସିଷ୍ଟାଣ୍ଟ ପ୍ରଫେସର, ବଲାଙ୍ଗୀର ମେଡିକାଲ କଲେଜରେ ୮ ପ୍ରଫେସର, ୧୨ ଆସୋସିଏଟ୍ ପ୍ରଫେସର ଓ ୧୧ ଆସିଷ୍ଟାଣ୍ଟ ପ୍ରଫେସର ପଦ ଖାଲି ପଡ଼ିଛି ।

ପ୍ରତାପ ଜେନା କହିଛନ୍ତି, ରାଜ୍ୟର ସମସ୍ତ ସରକାରୀ ଡାକ୍ତରଖାନାରେ ଖାଲି ପଡ଼ିଥିବା ଡାକ୍ତର ପଦଗୁଡ଼ିକୁ ପୂରଣ କରିବା ପାଇଁ ଓଡ଼ିଶା ଲୋକସଭା ଆୟୋଗଙ୍କୁ ୧୯୫୦ ସ୍ବାସ୍ଥ୍ୟ ଅଧିକାରୀ ଓ ୬୧ଟି ଦନ୍ତ ଚିକିତ୍ସକ ପଦ ପୂରଣ ପାଇଁ ଯୋଗ୍ୟ ବିବେଚିତ ତାଲିକା ପ୍ରଦାନ କରିବା ପାଇଁ ଅନୁରୋଧ କରାଯାଇଛି । ଯୋଗ୍ୟ ବିବେଚିତ ତାଲିକା ହସ୍ତଗତ ହେବା ପରେ ଡାକ୍ତରମାନଙ୍କୁ କାଉନସେଲିଂ ମାଧ୍ୟମରେ ଖାଲି ଥିବା ସ୍ଥାନରେ ନିଯୁକ୍ତି ଦିଆଯିବ । ଏହାସହ ରାଜ୍ୟର ସମସ୍ତ ଜିଲ୍ଲା ମୁଖ୍ୟ ଚିକିତ୍ସାଧିକାରୀଙ୍କୁ ପ୍ରତି ମାସ ୧ରୁ ୧୫ତାରିଖ ମଧ୍ୟରେ ଚୁକ୍ତିଭିକ୍ତିକ ସ୍ବାସ୍ଥ୍ୟ ଅଧିକାରୀ ନିଯୁକ୍ତି ପାଇଁ କ୍ଷମତା ପ୍ରଦାନ କରାଯାଇଛି ।

Comments are closed.