ଆତଙ୍କବାଦୀଙ୍କ ଟାର୍ଗେଟରେ ଥିବାରୁ ଫୋକସରେ ଶ୍ରୀକ୍ଷେତ୍ର ! ୨୮ରେ ପୁରୀ ଆସୁଛନ୍ତି ଏନଏସଜିର ସ୍ୱତନ୍ତ୍ର ଟିମ୍
କନକ ବ୍ୟୁରୋ : ଆତଙ୍କବାଦୀଙ୍କ ଟାର୍ଗେଟରେ ପୁରୀ ଶ୍ରୀମନ୍ଦିର । ଏନେଇ ଗୁଇନ୍ଦା ସୂଚନା ମିଳିବା ପରେ ତତ୍ପର ହୋଇଉଠିଛି ଏନଏସଜି । ଆସନ୍ତା ୨୮ ଓ ୨୯ ତାରିଖରେ ଏନଏସଜିରୁ ସ୍ୱତନ୍ତ୍ର ଟିମ ପୁରୀ ଆସୁଛନ୍ତି । କିନ୍ତୁ ତା’ପୂର୍ବରୁ ଆଜି ଏନଏସଜିର ତିନି ଜଣିଆ ଟିମ୍ ଶ୍ରୀମନ୍ଦିର ଚତୁପାଶ୍ୱର୍ର ଅନୁଧ୍ୟାନ କରିବା ସହ ସୁରକ୍ଷା ବ୍ୟବସ୍ଥା ଯାଂଚ କରିଛନ୍ତି । ଏହାପୂର୍ବରୁ ଏହି ତିନି ଜଣିଆ ଟିମ୍ ଶ୍ରୀମନ୍ଦିର ସୁରକ୍ଷା ବ୍ୟବସ୍ଥା କିଭଳି ରହିଛି ତାହାର ଅନୁଧ୍ୟାନ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏନଏସଜିର ଟେରର ଟାସ୍କ ଫୋର୍ସ ଟିମ୍ ଦୁଇ ଦିନ ଧରି ଶ୍ରୀମନ୍ଦିରର ସୁରକ୍ଷା ବ୍ୟବସ୍ଥା ଯାଂଚ କରିବେ ବୋଲି ପୂର୍ବରୁ ପୁରୀ ଜିଲ୍ଲା ପ୍ରଶାସନକୁ ଚିଠି ଲେଖାଯାଇଥିଲା । ଏନଏସଜି ମୁଖ୍ୟ କାର୍ଯ୍ୟାଳୟରୁ ଅପରେସନ୍ ପୋଲିସ ଆଇଜି ଆର.ପି. କୋଚେଙ୍କୁ ଏ ସଂପର୍କରେ ଚିଠି ମାଧ୍ୟମରେ ଜଣାଯାଇଥିଲା । ଏହି ଚିଠିର ଆଉ ଏକ କପି ପୁରୀ ଜିଲ୍ଳାପାଳଙ୍କୁ ପଠାଯାଇଥିଲା । ପୁରୀ ଶ୍ରୀମନ୍ଦିର ଆତଙ୍କବାଦୀଙ୍କ ଟାର୍ଗେଟରେ ଥିବା ଦୃଷ୍ଟିରୁ ଏନଏସଜି ପକ୍ଷରୁ ଏହାର ସୁରକ୍ଷା ବ୍ୟବସ୍ଥାକୁ ସୁଦୃଢ କରିବାକୁ ପଦକ୍ଷେପ ନିଆଯାଉଛି ।
ଗତମାସ ୧୪ ତାରିଖରେ ସମ୍ଭାବ୍ୟ ଆତଙ୍କବାଦୀ ଆକ୍ରମଣ ମୁକାବିଲା ପାଇଁ ରାଜଧାନୀ ଭୁବନେଶ୍ୱରରେ ଏନଏସଜି କମାଣ୍ଡୋ ମାନେ ବଡ ଧରଣର ମକଡ୍ରିଲ କରିଥିଲେ । ରାଜଧାନୀର ବିଭିନ୍ନ ସ୍ଥାନରେ ଆତଙ୍କବାଦୀ ଆକ୍ରମଣ କଲେ କିପରି ଏହାର ମୁକାବିଲା କରାଯିବ ସେ ନେଇ ଅଭ୍ୟାସ କରିଥିଲେ ଏନଏସଜି କମାଣ୍ଡୋ । ସଚିବାଳୟକୁ ଟାର୍ଗେଟ ପ୍ଲେସ ଭାବେ ବଛାଯାଇ ଏନଏସଜି,ସିଆଇଏସ୍ଏଫ ଓ କମିଶନରେଟ ପୁଲିସର ମିଳିତ ଉଦ୍ୟମରେ ମକଡ୍ରିଲ ହୋଇଥିଲା । ପୁଲିସ ଡିଜିଙ୍କ ସୂଚନା ଅନୁଯାୟୀ, ରାଜ୍ୟରେ ୨୪ଟି ସ୍ଥାନକୁ ସମ୍ବେଦନଶୀଳ ସ୍ଥାନ ଭାବେ ଚିହ୍ନଟ କରାଯାଇଛି ।