କେବେ ଆସିବ ‘ଅଚ୍ଛେ ଦିନ୍’ ? ପଞ୍ଚମ ଶ୍ରେଣୀ ଯୋଗ୍ୟତା ଥିବା ଚାକିରି ପାଇଁ ୫୦,୦୦୦ସ୍ନାତକ, ୨୮୦୦୦ ସ୍ନାତକୋତ୍ତର ଏବଂ ୩୭୦୦ ପିଏଚଡିଧାରୀଙ୍କ ଆବେଦନ
କନକ ବ୍ୟୁରୋ : ଭାରତରେ ବେକାରି ସମସ୍ୟା ଉତ୍କଟ ହେବାରେ ଲାଗିଛି । ଉଚ୍ଚଶିକ୍ଷିତ ହୋଇ ମଧ୍ୟ ଦେଶରେ ଲୋକଙ୍କୁ ମନଲାଖି ଚାକିରି ଖଣ୍ଡେ ମିଳୁନି । ଏଥିପାଇଁ ବିଦେଶକୁ ଯିବାକୁ ବାଧ୍ୟ ହେଉଛନ୍ତି ଲୋକେ । ଆମ ଦେଶର ଉଚ୍ଚଶିକ୍ଷିତ ତଥା ବୁଦ୍ଧିମାନ ବ୍ୟକ୍ତିମାନେ ବିଦେଶରେ କାମ କରୁଛନ୍ତି । ଅଧିକାଂଶ ନୂତନ ଉଦ୍ଭାବନ ପଛରେ ଭାରତୀୟଙ୍କ ହାତ ରହୁଛି । ତଥାପି ଆମ ଦେଶକୁ ମିଳୁନି ସମ୍ମାନ । ବାହାର ଦେଶ ଗୁଡ଼ିକ ନେଇ ଯାଉଛନ୍ତି ସମସ୍ତ ଶ୍ରେୟ । ତେବେ ଦେଶର ଏପରି ଅବସ୍ଥାକୁ ଦୃଷ୍ଟିରେ ରଖି କେନ୍ଦ୍ର ସରକାରଙ୍କ ତରଫରୁ ଅନେକ ପଦକ୍ଷେପ ନିଆଯାଉଛି । ହେଲେ ସେପରି କିଛି ଆଖିଦୃଶିଆ ସଫଳତା ମିଳୁନି । ତେବେ ଆଗକୁ ଏପରି ଅସୁବିଧା ନହେବା ପାଇଁ କେନ୍ଦ୍ର ସରକାର ପ୍ରସ୍ତୁତି ଆରମ୍ଭ କରିଥିବା କହୁଛନ୍ତି । ୨୦୨୦ ପର୍ୟ୍ୟନ୍ତ ମେକ୍ ଇନ୍ ଇଣ୍ଡିଆ ଦ୍ୱାରା ଭାରତରେ ୧୦ କୋଟିରୁ ଅଧିକ ନିଯୁକ୍ତ ସୁଯୋଗ ସୃଷ୍ଟି ହେବ ବୋଲି ମଧ୍ୟ କୁହାଯାଉଛି । କିନ୍ତୁ ମୋଦି ସରକାରଙ୍କ କାର୍ଯ୍ୟକାଳ ଶେଷ ହେବାକୁ ବସିଲାଣି ସତ ହେଲେ ଦେଶରେ ସେପରି ଚାକିରି ସୁଯୋଗ ସୃଷ୍ଟି ହୋଇପାରି ନାହିଁ । ଛୋଟ ମୋଟ ଚାକିରି ପାଇବା ଆଶାରେ ଡିଗ୍ରୀଧାରୀ ମାନେ ଲାଇନ୍ ଲଗାଉଛନ୍ତି । ନିକଟରେ ଏପରି କିଛି ଦେଖିବା ପାଇଁ ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ଏକ ଆଶ୍ଚର୍ଯ୍ୟଜନକ ଘଟଣାକ୍ରମରେ ଉତ୍ତରପ୍ରଦେଶରେ ଏକ ପଞ୍ଚମ ଶ୍ରେଣୀ ଯୋଗ୍ୟତା ଥିବା ଚାକିରି ପାଇଁ ବହୁ ସ୍ନାତକ, ସ୍ନାତକୋତ୍ତର ଏବଂ ପିଏଚ୍ଡି ଧାରୀମାନେ ଆବେଦନ କରିଛନ୍ତି । ଉତ୍ତରପ୍ରଦେଶ ପୁଲିସ୍ର ଟେଲିକମ୍ ବିଭାଗରେ ମେସେଞ୍ଜର ଚାକିରି ପାଇଁ ବହୁ ଉଚ୍ଚ ଶିକ୍ଷାପ୍ରାପ୍ତ ପ୍ରାର୍ଥୀ ଆବେଦନ କରିବା ଘଟଣା ଏବେ ଆଶ୍ଚର୍ଯ୍ୟର ବିଷୟ ହୋଇଛି । ଜଣାଯାଇଛି ଯେ ୫୦,୦୦୦ରୁ ଊର୍ଦ୍ଧ୍ୱ ସ୍ନାତକ, ୨୮୦୦୦ ସ୍ନାତକୋତ୍ତର ଏବଂ ୩୭୦୦ ପିଏଚ୍ଡି ଧାରୀ ଏହି ମେସେଞ୍ଜର ଚାକିରି ପାଇଁ ଆବେଦନ କରିଛନ୍ତି । ୬୨ଟି ପଦ ପାଇଁ ସମୁଦାୟ ୯୩,୦୦୦ ଜଣ ଆବେଦନ କରିଥିବା ଜଣାପଡ଼ିଛି । ତେବେ ସେମାନଙ୍କ ମଧ୍ୟରୁ କେବଳ ୭,୪୦୦ ଜଣ ପଞ୍ଚମରୁ ଦ୍ୱାଦଶ ଶ୍ରେଣୀ ଯାଏଁ ପଢ଼ିଛନ୍ତି । ବାକି ସମସ୍ତ ପ୍ରାର୍ଥୀ ଉଚ୍ଚ ଶିକ୍ଷା ହାସଲ କରିଛନ୍ତି । ଟେଲିକମ୍ ବିଭାଗରେ ଏହି ପଦବିଗୁଡ଼ିକ ୧୨ ବର୍ଷ ପରେ ଖାଲି ପଡ଼ିଛି । ତେବେ ଗୋଟିଏ ପଟେ ଚାକିରିର ଅଭାବ ଥିବାବେଳେ ଅନ୍ୟ ପଟେ ସରକାରୀ ଚାକିରି ଏବଂ ଆରମ୍ଭରୁ ୨୦,୦୦୦ ଟଙ୍କା ଦରମା ପାଇବା ଲୋଭରେ ଉଚ୍ଚ ଯୋଗ୍ୟତାସଂପନ୍ନ ପ୍ରାର୍ଥୀ ଆବେଦନ କରିଛନ୍ତି ।