ଜୋରଦାର ହେଲା ବ୍ରାହ୍ମଣୀ ନଦୀରେ ସେତୁ ନିର୍ମାଣ ରାଜନୀତି । ନବୀନଙ୍କ ଚିଠିର କଡା ଜବାବ ରଖିଲେ ଗଡକରୀ, କହିଲେ, ରାଜ୍ୟ ସରକାରଙ୍କ ଜଙ୍ଗଲ ବିଭାଗରୁ ଅନୁମତି ମିଳିଲେ ୭ଦିନ ଭିତରେ ଆରମ୍ଭ ହେବ କାମ
କନକ ବ୍ୟୁରୋ: ଜୋରଦାର ହୋଇଛି ବ୍ରାହ୍ମଣୀ ନଦୀରେ ସେତୁ ନିର୍ମାଣ ରାଜନୀତି । ସେତୁ ନିର୍ମାଣରେ ବିଳମ୍ବ ନେଇ କେନ୍ଦ୍ର ସରକାରଙ୍କ ମୁଖ୍ୟମନ୍ତ୍ରୀ ଲେଖିଥିବା ଚିଠିର କଡା ଜବାବ ରଖିଛନ୍ତି କେନ୍ଦ୍ରମନ୍ତ୍ରୀ ନିତିନ୍ ଗଡକରୀ । କହିଛନ୍ତି ଜମି ଅଧିଗ୍ରହଣରେ ବିଳମ୍ବ ଯୋଗୁଁ ସେତୁ ନିର୍ମାଣ କାମରେ ବିଳମ୍ବ ହେଉଛି । ବ୍ରାହ୍ମଣୀ ସେତୁ ନିର୍ମାଣ ପାଇଁ ରାଜ୍ୟ ସରକାରଙ୍କ ଜଙ୍ଗଲ ବିଭାଗର ଅନୁମତି ମିଳିଲେ ୭ ଦିନ ଭିତରେ କାମ ଆରମ୍ଭ କରାଯିବ ବୋଲି ନବୀନଙ୍କ ଚିଠିର ଉତ୍ତରରେ ଲେଖିଛନ୍ତି ନୀତିନ ଗଡକରୀ ।
Kanak News is now on WhatsApp
Join and get latest news updates delivered to you via WhatsApp
ବୈଧାନିକ ଅନୁମତି ମିଳିନଥିବାରୁ କେବଳ ବ୍ରହ୍ମଣୀ ସେତୁ ନୁହେଁ ଆହୁରି ୩ଟି ସେତୁ କାମ ଆଗେଇ ପାରୁନଥିବା ଗଡକରୀ ତାଙ୍କ ଚିଠିରେ ଉଲ୍ଲେଖ କରିଛନ୍ତି । ଏନଏଚଆଇ ଯୋଗୁଁ କାମରେ ବିଳମ୍ବ ନେଇ ନବୀନ ଚିଠିରେ ଲେଖିଥିବା ବେଳେ ଏହା କେନ୍ଦ୍ରମନ୍ତ୍ରୀଙ୍କୁ ବିସ୍ମିତ କରିଥିବା କହିଛନ୍ତି । କେନ୍ଦ୍ର ନକଲେ ରାଜ୍ୟ ସରକାର ନିଜ ଖର୍ଚ୍ଚରେ ସେତୁ ନିର୍ମାଣ କରିବେ ବୋଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଘୋଷଣା କରିଥିବା ବେଳେ, କେନ୍ଦ୍ର ପରିବହନ ମନ୍ତ୍ରୀ ଆଉ ପାଦେ ଆଗେଇ ଯାଇ କହିଛନ୍ତି, ବ୍ରାହ୍ମଣୀ ଉପରେ ଦୁଇ ଲେନ୍ ନୁହେଁ ୬ ଲେନ୍ ବିଶିଷ୍ଟ ସେତୁ ନିର୍ମାଣ କରାଯିବ ।
ଉଲ୍ଲେଖଯୋଗ୍ୟ ଯେ, ବ୍ରାହ୍ମଣୀ ଉପରେ ଦ୍ୱିତୀୟ ସେତୁ ନିର୍ମାଣ ନେଇ ରାଜନୀତି ଜୋର ଧରିଛି । ବିଜେଡି-ବିଜେପି ମୁହାଁମୁହିଁ ହୋଇଛନ୍ତି । ସେତୁ ପାଇଁ ତତକାଳୀନ ୟୁପିଏ ସରକାର ମଞ୍ଜୁରୀ ଦେଇଥିଲେ । ୨୦୧୪ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରାଉରକେଲା ଆସି ନିର୍ମାଣ ନେଇ ଘୋଷଣା ବି କରିଥିଲେ । କିନ୍ତୁ କାମ ଏବେ ବି ମନ୍ଥର ଗତିରେ ଚାଲିଛିା କାମ ମନ୍ଥର ନେଇ ସ୍ଥାନୀୟ ବିଧାୟକ ଦିଲ୍ଲୀପ ରାୟ ଅସନ୍ତୋଷ ବି ପ୍ରକାଶ କରିସାରିଛନ୍ତି । ଏପରିକି ସୋମବାରଦିନ ସୁନ୍ଦରଗଡ ଜିଲ୍ଲାର କିଛି ସଙ୍ଗଠନ ଓ ବିଜେଡି ନେତା ମୁଖ୍ୟମନ୍ତ୍ରୀଙ୍କୁ ଭେଟିଥିଲେ । ଏଠାରେ ମୁଖ୍ୟମନ୍ତ୍ରୀ ଘୋଷଣା କରିଥିଲେ- କେନ୍ଦ୍ର ନ କଲେ ରାଜ୍ୟ ସରକାର ନିଜସ୍ୱ ଖର୍ଚରେ ସେତୁ କରିବେ । ଏହା ପରେ ରାଜନୀତି ସରଗରମ ହୋଇଥିଲା ।