ଇଞ୍ଜିନିୟରିଂ ପଢିବାକୁ ଚାହୁଁନାହାନ୍ତି ଛାତ୍ରଛାତ୍ରୀ ! ବନ୍ଦ ହୋଇଯିବ ଦେଶର ୨୦୦ ଇଞ୍ଜିନିୟରିଂ କଲେଜ

11

ବନ୍ଦ ହୋଇଯିବ ଦେଶର ୨୦୦ ଇଞ୍ଜିନିୟରିଂ କଲେଜ । ଇଞ୍ଜିନିୟରିଂ ପାଠ ପଢା ଠାରୁ ଛାତ୍ରଛାତ୍ରୀ ମାନେ ମୁହଁ ମୋଡିବା ଆରମ୍ଭ କଲେଣି । ଯାହା ଫଳରେ ବିଭିନ୍ନ ଇଞ୍ଜିନିୟରିଂ କଲେଜରେ ଅଧିକାଂଶ ସିଟ ଫାଙ୍କା ପଡୁଛି । ତେଣୁ ଏହାକୁ ଦୃଷ୍ଟିରେ ରଖି ୨୦୦ ଇଞ୍ଜିନିୟରିଙ୍ଗ କଲେଜ ବନ୍ଦ ହେବାକୁ ଯାଉଛି । ପୂର୍ବରୁ ଯେଉଁଠି ଇଞ୍ଜିନିୟରିଂ ପାଇଁ ଛାତ୍ରଛାତ୍ରୀଙ୍କ ମଧ୍ୟରେ ପ୍ରତିଯୋଗିତା ଲାଗି ରହୁଥିଲା ଏବେ ସେଥିରେ ପରିବର୍ତ୍ତନ ଆସିଛି ।

ଅଲ ଇଣ୍ଡିଆ କାଉନସିଲ ଫର୍ ଟେକନିକାଲ ଏଜୁକେସନ ବା (AICTE) ଅନୁଯାୟୀ, ପାଖାପାଖି ୨୦୦ ଇଞ୍ଜିନିୟରିଂ କଲେଜ ସିଟ୍ ଫାଙ୍କା ପଡୁଥିବାରୁ ବନ୍ଦ କରିବାକୁ ଆବେଦନ କରିଛନ୍ତି । ଫଳରେ ବନ୍ଦ ହେବାକୁ ଥିବା ୨୦୦ କଲେଜରେ ଚଳିତବର୍ଷ ଠାରୁ ଆଉ ଆଡମିଶନ କରାଯିବ ନାହିଁ । ତେବେ କେଉଁ ୨୦୦ଟି କଲେଜ ବନ୍ଦ ହେବ ସେନେଇ କୌଣସି ସ୍ପଷ୍ଟ ସୂଚନା ମିଳିନାହିଁ ।

ଏଆଇସିଟିଇ ଅନୁଯାୟୀ, ଯେଉଁ କଲେଜ ବନ୍ଦ ହେବାକୁ ଯାଉଛି ସେହି କଲେଜରେ ପଢୁଥିବା ଛାତ୍ରଛାତ୍ରୀଙ୍କ କୋର୍ସ ନ ସରିବା ପର୍ଯ୍ୟନ୍ତ ପାଠପଢା ଜାରି ରହିବ । କିନ୍ତୁ ଚଳିତ ବର୍ଷ ଠାରୁ ବନ୍ଦ ହେବାକୁ ଥିବା କଲେଜରେ ନୂଆ ଛାତ୍ରଛାତ୍ରୀ ଆଡମିଶନ ନେଇପାରିବେ ନାହିଁ । ତେଣୁ ଛାତ୍ରଛାତ୍ରୀଙ୍କ କୋର୍ସ ସରିବା ପରେ ହିଁ କଲେଜ ବନ୍ଦ ରହିବ । ୨୦୦ଟି କଲେଜ ବନ୍ଦ ହେବା ପରେ ସର୍ବଭାରତୀୟ ସ୍ତରରେ ଇଞ୍ଜିନିୟରିଂ ସିଟ୍ ମଧ୍ୟ ହ୍ରାସ ପାଇବ । ରିପୋର୍ଟ ଅନୁଯାୟୀ, ଚଳିତବର୍ଷ ପ୍ରାୟ ୮୦,୦୦୦ ହଜାର ସିଟ୍ ହ୍ରାସ ପାଇବ ।

ଯଦି ରିପୋର୍ଟ ଉପରେ ନଜର ପକାଇବା, ତେବେ ୨୦୧୨-୧୩ ଶିକ୍ଷା ବର୍ଷରେ ପୂର୍ବବର୍ଷ ଅପେକ୍ଷା ୧.୮୬ ଲକ୍ଷ କମ ଛାତ୍ରଛାତ୍ରୀ ଇଞ୍ଜିନିୟରିଂ କଲେଜରେ ଆଡମିଶନ ନେଇଥିଲେ । ଏହାଛଡା ପ୍ରତିବର୍ଷ ଇଞ୍ଜିନିୟରିଂରେ ପାଠ୍ୟକ୍ରମରେ ଛାତ୍ରଛାତ୍ରୀଙ୍କ ଆଡମିଶନ ହ୍ରାସ ପାଉଛି । ୨୦୧୬-୧୭ ବର୍ଷରେ ଇଞ୍ଜିନିୟରିଂରେ ଅଣ୍ଡର ଗ୍ରାଜୁଏସନ କରୁଥିବା ଛାତ୍ରଛାତ୍ରୀଙ୍କ ପାଇଁ ମୋଟ ୧୫,୭୧,୨୨୦ ସିଟ ଥିବା ବେଳେ ମୋଟ ୭ ,୮୭,୧୨୭ ଜଣ ଛାତ୍ରଛାତ୍ରୀ ଆଡମିଶନ କରିଥିଲେ । ମୋଟ ସିଟର ୫୦ ପ୍ରତିଶତ ସିଟ ଫାଙ୍କା ପଡିଥିଲା । ଗୋଟିଏ ପଟେ ଘରୋଇ ଓ ସରକାରୀ ଇଞ୍ଜିନିୟରିଂ କଲେଜରେ ଛାତ୍ରଛାତ୍ରୀଙ୍କ ସଂଖ୍ୟା ହ୍ରାସ ପାଉଥିବା ବେଳେ ଆଇଆଇଟି ଓ ଏନଆଇଟି ଭଳି ଶିକ୍ଷାନୁଷ୍ଠାନରେ ପଢିବା ପାଇଁ ଛାତ୍ରଛାତ୍ରୀଙ୍କ ଅଧିକ ଉତ୍ସାହ ଦେଖିବାକୁ ମିଳୁଛି ।

Comments are closed.