ଦିଲ୍ଲୀ ହାଇକୋର୍ଟରେ ଆଜି ଆମ ଆଦମି ପାର୍ଟି ଆବେଦନର ଶୁଣାଣି ! ୨୦ ବିଧାୟକଙ୍କୁ ଅଯୋଗ୍ୟ ଘୋଷଣା ନେଇ ଫଇସଲା କରିପାରନ୍ତି କୋର୍ଟ
କନକ ବ୍ୟୁରୋ : ଆମ ଆଦମି ପାର୍ଟିର ୨୦ ବିଧାୟକଙ୍କୁ ଅଯୋଗ୍ୟ ଘୋଷଣା ନେଇ ଦିଲ୍ଲୀ ହାଇକୋର୍ଟରେ ଆଜି ଶୁଣାଣି । ଆପ ପକ୍ଷରୁ ହୋଇଥିବା ଆବେଦନକୁ ଆଜି ଶୁଣାଣି ପାଇଁ ସ୍ଥାନିତ କରିଛନ୍ତି କୋର୍ଟ । ବଡକଥା ହେଉଛି ଏହି ୨୦ ବିଧାୟକଙ୍କୁ ନିର୍ବାଚନ କମିଶନ ଅଯୋଗ୍ୟ ଘୋଷଣା କରିଥିବା ବେଳେ ସୁପାରିଶରେ ମୋହର ମାରିସାରିଛନ୍ତି ରାଷ୍ଟ୍ରପତି ରାମନାଥ କୋବିନ୍ଦ । ତେବେ ନିର୍ବାଚନ କମିଶନଙ୍କ ଏହି ନିଷ୍ପତିକୁ ଅବୈଧ କରିବା ଲାଗି ଦିଲ୍ଲୀ ହାଇକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି ଦିଲ୍ଲୀ ଆପ ସରକାର । ତେବେ ପୂର୍ବରୁ ଏହା ଉପରେ ଅନ୍ତରୀଣ ରହିତାଦେଶ ପାଇଁ ମନା କରିଦେଇଥିଲେ କୋର୍ଟ । ଦିଲ୍ଲୀ ହାଇକୋର୍ଟଙ୍କ ରାୟ ଆପ ସପକ୍ଷରେ ନଆସିଲେ ପୁଣି ସୁପ୍ରିମକୋର୍ଟ ଯାଇପାରନ୍ତି କେଜ୍ରିୱାଲ ସରକାର । ସେପଟେ ୨୦ ବିଧାୟକ ଅଯୋଗ୍ୟ ଘୋଷଣା ହେବା ପରେ ଏସବୁ ଆସନରେ ଉପନିର୍ବାଚନ ହେବ । ଏବଂ ଦିଲ୍ଲୀରେ ମାତ୍ର ବର୍ଷକର ସରକାର ପୁଣି ଏକ ବଡ ପ୍ରତିଦ୍ୱନ୍ଦିତାର ସାମ୍ନା କରିବାକୁ ପ୍ରସ୍ତୁତ ହେବେ । ଯାହା କେଜ୍ରିୱାଲ ସରକାରଙ୍କ ପ୍ରଦର୍ଶନର ପରୀକ୍ଷା ହେବ ବୋଲି କୁହାଯାଉଛି । ତେବେ ଏହାକୁ ବିଜେପିର ଚାଲ କହି ନ୍ୟାୟିକ ଲଢେଇ ପାଇଁ କେଜ୍ରିୱାଲ ସରକାର ପ୍ରସ୍ତୁତ ହେଉଥିବାବେଳେ ବିଜେପି ଓ କଂଗ୍ରେସ ନିର୍ବାଚନୀ ଲଢେଇ ପାଇଁ ପ୍ରସ୍ତୁତ ହେଉଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏହି ୨୦ ଜଣ ବିଧାୟକ ଅଯୋଗ୍ୟ ଘୋଷିତ ହେବା ପରେ କେଜ୍ରିଓ୍ଵାଲଙ୍କ ଆପ୍ ସରକାର ପାଇଁ ତୁରନ୍ତ କୌଣସି ବଡ଼ ବିପଦ ନଥିଲେ ହେଁ ଏହା ଦଳର ସଂକଟ ବଢ଼ାଇଦେଇଛି । ଏହା ଫଳରେ ଦିଲ୍ଲୀ ବିଧାନସଭାରେ ଆପ୍ ସଦସ୍ୟ ସଂଖ୍ୟା ୪୨କୁ ଖସି ଆସିଛି । ୩ ବର୍ଷ ତଳେ ହୋଇଥିବା ନିର୍ବାଚନରେ ବିଧାନସଭାର ମୋଟ ୭୦ ଆସନରୁ ଆପ୍ ୬୭ ଆସନ ଦଖଲ କରି ବିପୁଳ ସଂଖ୍ୟାଗରିଷ୍ଠତା ହାସଲ କରିଥିଲା । ୨୦୧୫ରେ ଦଳ ଅସୀମ ଅହମ୍ମଦ ଖାନଙ୍କୁ ନିଲମ୍ବନ କରିଥିଲା । ପରବର୍ତ୍ତୀ ସମୟରେ ଆଉ ଜଣେ ବିଧାୟକ ପଙ୍କଜ ପୁଷ୍କର ମୁଖ୍ୟମନ୍ତ୍ରୀ କେଜ୍ରିଓ୍ଵାଲଙ୍କ ବିରୋଧରେ ବିଦ୍ରୋହ କରି ଦଳରୁ ନିଲମ୍ବିତ ହୋଇଥିଲେ । ୨୦୧୬ରେ ଆଉ ଜଣେ ମନ୍ତ୍ରୀ ସନ୍ଦୀପ କୁମାର ସେକ୍ସ ସ୍କାଣ୍ଡାଲ ମାମଲାରେ ବହିଷ୍କୃତ ହୋଇଥିଲେ । ଏହାପରେ ମନ୍ତ୍ରୀ କପିଳ ମିଶ୍ରା ଦଳ ବିରୋଧୀ କାର୍ୟ୍ୟ କରି ମନ୍ତ୍ରିମଣ୍ଡଳରୁ ବିଦା ହୋଇଥିବା ବେଳେ ପରବର୍ତ୍ତୀ ସମୟରେ ତାଙ୍କୁ ନିଲମ୍ବନ କରାଯାଇଥିଲା । ୨୦୧୭ରେ ବିଧାୟକ ଜର୍ଣ୍ଣାଲି ସିଂହ ପଂଜାବରେ ନିର୍ବାଚନ ଲଢ଼ିବା ପାଇଁ ଇସ୍ତଫା ଦେଇଥିଲେ ଏବଂ ଉପ ନିର୍ବାଚନରେ ଏହି ଆସନ ଆପ୍ ବଜାୟ ରଖିପାରି ନଥିଲା । ଏଭଳି ସ୍ଥିତିରେ ଆଉ ୨୦ ବିଧାୟକ ଅଯୋଗ୍ୟ ଘୋଷଣା ପରେ ଆପ୍ର ଶକ୍ତି ୪୨କୁ ଖସିଆସିଛି ।