ଦୁଇ ପ୍ରକାରର ୫୦୦ ଟଙ୍କିଆ ନୋଟ୍ ନେଇ ସଂସଦ ସରଗରମ ! କଂଗ୍ରେସର ଅଭିଯୋଗ, ଏହା ଶତାଦ୍ଦୀର ସବୁଠାରୁ ବଡ଼ ଘୋଟଲା
ଦୁଇ ପ୍ରକାର ୫୦୦ ଟଙ୍କିଆ ନୋଟ୍ ନେଇ ଆଜି ସଂସଦ ସରଗରମ । ରାଜ୍ୟସଭାରେ ଦୁଇ ପ୍ରକାରର ୫୦୦ ଟଙ୍କିଆ ନୋଟ ନେଇ ହଙ୍ଗାମା କରିଛି କଂଗ୍ରେସ । ୫୦୦ ଟଙ୍କିଆ ଦୁଇ ପ୍ରକାର ନୋଟର ଆକାର ଓ ଡିଜାଇନ ଅଲଗା ଅଲଗା ଥିବା ମଧ୍ୟ ଦର୍ଶାଇଛି । କଂଗ୍ରେସ ଅଭିଯୋଗ କରିଛି ଏହା ଶତାଦ୍ଦୀର ସବୁଠାରୁ ବଡ଼ ଘୋଟଲା । ଆମେ ମଧ୍ୟ ଶାସନରେ ରହିଛୁ , କିନ୍ତୁ ଆମେ କେବେ ବି ଦୁଇ ପ୍ରକାରର ନୋଟ୍ ଛାପିନାହୁଁ । ଦୁଇ ପ୍ରକାର ନୋଟ ମଧ୍ୟରୁ ଗୋଟିଏ ଦଳ ପାଇଁ ଆଉ ଗୋଟିଏ ସରକାର ପାଇଁ ବୋଲି କହିଛି କଂଗ୍ରେସ । ଏବେ ବଜାରରେ ଦୁଇ ପ୍ରକାରର ୫୦୦ ଟଙ୍କିଆ ନୋଟ୍ ଓ ୨୦୦୦ ଟଙ୍କିଆ ନୋଟ୍ ଉପଲବ୍ଧ ବୋଲି କହିଛନ୍ତି କଂଗ୍ରେସ ନେତା ଗୁଲାମ ନବୀ ଆଜାଦ୍ ।
Kanak News is now on WhatsApp
Join and get latest news updates delivered to you via WhatsApp
ଏହାର ଜବାବରେ ଅର୍ଥମନ୍ତ୍ରୀ ଅରୁଣ ଜେଟଲୀ କହିଛନ୍ତି, ନୋଟ୍ ଛପା ବିଷୟରେ ଏପରି ଦାୟିତ୍ୱହୀନ ମନ୍ତବ୍ୟ ଦେବା ଠିକ ନୁହଁ । ଶୂନ୍ୟକାଳରେ ଅନେକ ମହତ୍ୱପୂର୍ଣ୍ଣ ବିଷୟରେ ଆଲୋଚନା ହୋଇପାରିବ ବୋଲି ସେ କହିଛନ୍ତି । କଂଗ୍ରେସ ଦଳର ବରିଷ୍ଠ ନେତା କପିଲ ଶିବଲ କହିଛନ୍ତି, ଆଜି ଆମେ ଜାଣିଲୁ ମୋଦି ସରକାର କାହିିଁକିି ବିମୁଦ୍ରାକରଣର ନିଷ୍ପତ୍ତିି ନେଇଛନ୍ତି ? ତୃଣମୂଳ କଂଗ୍ରେସର ନେତା ଡ଼େରେକ ଓବ୍ରିୟନ କଂଗ୍ରେସର ସମର୍ଥନ କରି କହିଛନ୍ତିି, ଶିବଲ ଏକ ଗମ୍ଭୀର ମାମଲା ଉପରେ ସ୍ୱର ଉଠାଇଛନ୍ତି ।
ଏସବୁ ପରେ ଅରୁଣ ଜେଟଲୀ କହିଛନ୍ତି, ସେ ନୋଟର ପ୍ରାମାଣିକତା ଉପରେ ଦୃଷ୍ଟି ଦେବେ । ଅର୍ଥ ମନ୍ତ୍ରାଳୟ ସୂତ୍ର ଅନୁସାରେ ନୋଟର ଆକାର ଓ ଡିଜାଇନରେ ମାମୁଲି ପରିବର୍ତ୍ତନ ସମ୍ଭବ । ଏହାସହ ସେମାନେ ସ୍ପଷ୍ଟ କରିଛନ୍ତି ସରକାର ଏପରି ନୋଟ ମୁଦ୍ରଣ ପାଇଁ ଆଦେଶ ଦେଇ ନାହାନ୍ତି । ଭିନ୍ନ ଭିନ୍ନ ପ୍ରିଣ୍ଟିଙ୍ଗ ପ୍ରେସ ଯୋଗୁଁ ନୋଟର ଆକାର ଓ ଡିଜାଇନ ଏପରି ହୋଇଛି ବୋଲି ସେମାନେ ଦର୍ଶାଇଛନ୍ତି ।
ସୂଚନାଯୋଗ୍ୟ, ୫୦୦ ଟଙ୍କିଆ ନୋଟରେ ମୁଦ୍ରଣ ଜନିତ ତ୍ରୁଟି ଥିଲା ବୋଲି ପୂର୍ବରୁ ରିଜର୍ଭ ବ୍ୟାଙ୍କ୍ ସ୍ପଷ୍ଟୀକରଣ ଦେଇଥିଲା । ଏହା ସହ ବଜାରରେ ଦୁଇ ପ୍ରକାରର ନୋଟ ଉପଲବ୍ଧ ବୋଲି ମଧ୍ୟ ସ୍ୱୀକାର କରିଥିଲା ଆରବିଆଇ । ଜରୁରୀ ପରିସ୍ଥିତରେ ଦ୍ରୁତ ଗତିରେ ନୂଆ ଟଙ୍କା ମୁଦ୍ରଣ ଚାଲିଥିବାରୁ ଏଭଳି ତ୍ରୁଟି ଘଟିଥିଲା ବୋଲିି ଆରବିଆଇ ପକ୍ଷରୁ କୁହାଯାଇଥିଲା ।