ବିପଦ ଶଙ୍କୁଳ ଗୃହରେ ଚାଲିଛି ଶିକ୍ଷାଦାନ : ଶ୍ରେଣୀ ଗୃହରେ ଲହଡ଼ି ମାରୁଛି ବର୍ଷା ପାଣି, ପ୍ରଶାସନ ଚୁପ ବସିଥିବା ଅଭିଯୋଗ
କନକ ବ୍ୟୁରୋ: ପ୍ରାଥମିକ ଶିକ୍ଷାର ବିକାଶ ପାଇଁ ଯୋଜନା ପରେ ଯୋଜନା କରି ଚାଲୁଛନ୍ତି ରାଜ୍ୟ ସରକାର । ସର୍ବଶିକ୍ଷା ଯୋଜନା ମାଧ୍ୟମରେ ବିଦ୍ୟାଳୟ ମାନଙ୍କରେ ଆବଶ୍ୟକ ଶ୍ରେଣୀଗୃହ ଯୋଗାଇ ଦେଉଛନ୍ତି । କିନ୍ତୁ ହାଟଡିହି ବ୍ଲକ ସମଣା ପଞ୍ଚାୟତର ଚାପୁଣ୍ଡିଆ ସ୍କୁଲରେ ଆଜି ପର୍ଯ୍ୟନ୍ତ ଶ୍ରେଣୀଗୃହ ନିର୍ମାଣ ନହେବାରୁ ଶିକ୍ଷାଦାନ ବାଧାପ୍ରାପ୍ତ ହୋଇଛି । ବର୍ଷା ହେଲେ ଶ୍ରେଣୀଗୃହ ଭିତରେ ପାଣି ଲହଡି ମାରୁଛି । ପିଲାମାନେ ବସିବାପାଇଁ ସ୍ଥାନ ଟିକିଏ ପାଉ ନଥିବାବେଳେ ଠିଆ ହୋଇ ଶିକ୍ଷାଲାଭ କରୁଛନ୍ତି । ଏଭଳି ଘଟଣା ଦେଖିବାକୁ ମିଳିଛି ଗଣଶିକ୍ଷା ମନ୍ତ୍ରୀଙ୍କ ନିଜ ଜିଲ୍ଲାରେ ।
Kanak News is now on WhatsApp
Join and get latest news updates delivered to you via WhatsApp
କେନ୍ଦୁଝର ଜିଲ୍ଲା ହାଟଡିହି ବ୍ଲକ ଚାପୁଣ୍ଡିଆଗ୍ରାମରେ ଥିବା ଭାଗିରଥି ନୋଡାଲ ବିଦ୍ୟାଳୟରେ ପ୍ରଥମରୁ ଅଷ୍ଟମ ପର୍ଯ୍ୟନ୍ତ ୮ଟି ଶ୍ରେଣୀରେ ମୋଟ ୬୮ଜଣ ଛାତ୍ରଛାତ୍ରୀ ଅଧ୍ୟୟନ କରିଥାନ୍ତି । ୮ଟି ଶ୍ରେଣୀପାଇଁ ମାତ୍ର ତିନୋଟି ଶ୍ରେଣୀଗୃହ ଥିବାବେଳେ ସେଥିମଧ୍ୟରୁ ଦୁଇଟି ଶ୍ରେଣୀଗୃହର ଆଜବେଷ୍ଟ ଭାଙ୍ଗି ଯିବା ସହ ବିପଦ ସଂକୁଳ ହୋଇପଡିଛି । କାନ୍ଥ ଗୁଡିକରୁ ପ୍ଲାଷ୍ଟାର ଖସିପଡିଥିବା ସହ କାନ୍ଥ ଗୁଡିକ ଫାଟି ଯାଇ ଆଁ କରିଛି । ବର୍ଷା ହେବାଯୋଗୁଁ ଭଙ୍ଗା ଆଜବେଷ୍ଟସ ଦେଇ ବର୍ଷାପାଣି ଶ୍ରେଣୀ ଗୃହ ଭିତରେ ପଡୁଛି ଯେ ଛାତ୍ରଛାତ୍ରୀ ମାନେ ବସିବାପାଇଁ ସ୍ଥାନ ଟିଏ ପାଉନାହାନ୍ତ । ଶ୍ରେଣୀଗୃହ ଭିତରେ ପାଣି ଲହଡି ମାରୁଛି ।
ସ୍କୁଲରେ ବସିବାପାଇଁ ସ୍ଥାନ ନଥିବାରୁ ପିଲାମାନେ ମଧ୍ୟାହ୍ନ ଭୋଜନ ଖାଇବାକୁ ପିଲାମାନେ ନାନା ଅସୁବିଧାର ସମ୍ମୁଖୀନ ହେଉଥିବାବେଳେ ସ୍କୁଲ ପର୍ଯ୍ୟନ୍ତ ରାସ୍ତା ନଥିବାରୁ ଆଣ୍ଠୁଏ ପାଣିରେ ପସି ସ୍କୁଲକୁ ଯାଉଛନ୍ତି । ବିଦ୍ୟାଳୟର ଫଟା କାନ୍ଥ ମଧ୍ୟରେ ନାନା ପ୍ରଜାତିର ବିଷଧର ସାପ ମାନ ବସବାସ କରୁଥିବାରୁ ଏହା ପିଲାମାନଙ୍କ ଜୀବନ ପ୍ରତି ବିପଦ ସୃଷ୍ଟି କରିଛି । ଶ୍ରେଣୀଗୃହ ପାଇଁ ୪ବର୍ଷ ହେଲା ଗ୍ରାମବାସୀମାନେ ଦାବି କରି ଅସୁଥିଲେ ମଧ୍ୟ ଶିକ୍ଷାବିଭାଗର ଉଚ୍ଚ କର୍ତ୍ତୁପକ୍ଷ ବର୍ଷ ବର୍ଷ କହି ସମୟ ଗଡାଇ ଚାଲିଛନ୍ତି । ଗତ ୨୦୧୧ ମସିହାରେ ଏକ ଶ୍ରେଣୀଗୃହ ନିର୍ମାଣ କରାଯାଉଥିବାବେଳେ ତାହା ଅଧାପନ୍ତରିଆ ଭାବେ ପଡି ରହିଛି । ତୁରନ୍ତ ଶ୍ରେଣୀଗୃହ ନିର୍ମାଣ କରିବା ସହିତ ରାସ୍ତା ନିର୍ମାଣ ପାଇଁ ଗ୍ରାମବାସୀ ଦାବି କରିଛନ୍ତି ।