ତାମିଲନାଡୁର ପଲାନିସ୍ୱାମୀ ସରକାରଙ୍କୁ ବଡ ଆଶ୍ୱସ୍ତି ! ୧୮ ଜଣ ବିଦ୍ରୋହୀ ବିଧାୟକଙ୍କ ଅଯୋଗ୍ୟତା କାଏମ ରଖିଲେ ମାଡ୍ରାସ ହାଇକୋର୍ଟ ।
କନକ ବ୍ୟୁରୋ : ତାମିଲନାଡୁର ପଲାନିସ୍ୱାମୀ ସରକାରଙ୍କୁ ବଡ ଆଶ୍ୱସ୍ତି । ୧୮ ଜଣ ବିଧାୟକଙ୍କୁ ଅଯୋଗ୍ୟ ଘୋଷିତ ନିଷ୍ପତିକୁ କାଏମ ରଖିଲେ ମାଡ୍ରାସ ହାଇକୋର୍ଟ । ଦିନାକରଣ ଗୋଷ୍ଠୀର ଯେଉଁ ୧୮ ଜଣ ବିଧାୟକଙ୍କ ସଦସ୍ୟତାକୁ ତାମିଲନାଡୁ ବିଧାନସଭାର ବାଚସ୍ପତି ରଦ୍ଦ କରିଥିଲେ ସେହି ବିଧାୟକମାନଙ୍କ ଅଯୋଗ୍ୟତାକୁ ହାଇକୋର୍ଟ କାଏମ ରଖିଛନ୍ତି । ତାମିଲନାଡୁ ବିଧାନସଭାର ବାଚସ୍ପତିଙ୍କ ନିଷ୍ପତିକୁ ମାଡ୍ରାସ ହାଇକୋର୍ଟ ବିଚାରପତି ଜଷ୍ଟିସ ଏମ୍. ସତ୍ୟନାରାୟଣ କାଏମ ରଖିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଦିନାକରଣ ଗୋଷ୍ଠୀର ସମର୍ଥକ କୁହାଯାଉଥିବା ଏହି ୧୮ ଜଣ ବିଧାୟକ ଗତ ବର୍ଷ ଅଗଷ୍ଟ ୨୨ ତାରିଖରେ ରାଜ୍ୟପାଳ ବିଦ୍ୟାସାଗର ରାଓଙ୍କୁ ସାକ୍ଷାତ କରିଥିଲେ । ଏହା ପରେ ରାଜ୍ୟରେ କ୍ଷମତାସୀନ ଏଆଇଏଡିଏମକେ ସରକାରଙ୍କୁ ଦିନାକରଣ ଗାଦିଚ୍ୟୁତ କରିବାକୁ ଉଦ୍ୟମ କରୁଥିବା ନେଇ ଚର୍ଚ୍ଚା ଜୋର ଧରିଥିଲା । ଏହା ପରେ ତାମିଲନାଡୁ ବିଧାନସଭାର ବାଚସ୍ପତି ପି. ଧନପାଲ ଏହି ବିଦ୍ରୋହୀ ବିଧାୟକମାନଙ୍କୁ ଅଯୋଗ୍ୟ ଘୋଷିତ କରିଥିଲେ ।
ଫଳରେ ଆସ୍ଥା ଭୋଟ୍ରେ ମଧ୍ୟ ଏହି ୧୮ ଜଣ ବିଧାୟକ ଭୋଟ୍ ଦେଇ ପାରିନଥିଲେ । ପରେ ଏହି ମାମଲା ସୁପ୍ରିମକୋର୍ଟରେ ପହଁଚିଥିଲା । ତେବେ ମାମଲାର ବିଚାର ପାଇଁ ତାମିଲନାଡୁ ହାଇକୋର୍ଟର ବିଚାରପତି ଜଷ୍ଟିସ ଏମ୍. ସତ୍ୟନାରାୟଣଙ୍କୁ ଦାୟିତ୍ୱ ଦେଇଥିଲେ ସୁପ୍ରିମକୋର୍ଟ । ତେଣୁ ଆଜି ହାଇକୋର୍ଟଙ୍କ ନିର୍ଦ୍ଦେଶ ପରେ ପଲାନିସ୍ୱାମୀ ସରକାର ଉପରୁ ସଙ୍କଟ ଟଳି ଯାଇଛି ।