କନକ ବ୍ୟୁରୋ: ପୋଖରୀ ଖୋଳୁ ଖୋଳୁ ମିଳିଲା ଶଙ୍ଖ । ପୁଣି ଗୋଟିଏ ନୁହେଁ କି ଦୁଇଟି ନୁହେଁ ମାଟି ତଳୁ ମିଳିଲା ଶତାଧିକ ଶଙ୍ଖ । ଏପରି ଘଟଣା ଘଟିଛି ଭଦ୍ରକ ଜିଲ୍ଲା ଚାନ୍ଦବାଲି ବ୍ଲକ୍ ଅନ୍ତର୍ଗତ ଜଳେଶ୍ୱରପୁରରେ । ଜଗନ୍ନାଥ ଯତିଙ୍କ ବାଡି ପଟେ ଏକ ନୂଆ ପୋଖରୀ ଖୋଳା ହେଉଥିବା ବେଳେ ଏହି ଶଙ୍ଖ ସବୁ ମିଳିଛି । ଗତକାଲି ମାଟି ଖୋଳା ଚାଲିଥିବା ବେଳେ ପ୍ରାୟ ୪ ଫୁଟ ତଳୁ ୧୭୪ରୁ ଅଧିକ ଶଙ୍ଖ ମିଳିଛି । ଆଜି ମଧ୍ୟ ପୁଣି ମାଟି ଖୋଳାଯିବ ।
Kanak News is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ଅନୁସାରେ,ଜଳେଶ୍ୱରପୁର ମଝିସାହି ଗାଁର ଜଗନ୍ନାଥ ଯତି ନାମକ ଜଣେ ବ୍ୟକ୍ତି ନିଜ ଜମିରେ ଚିଙ୍ଗୁଡ଼ି ଚାଷ ପାଇଁ ପୋଖରି ଖୋଳୁଥିଲେ । ମାତ୍ର ୪ ଫୁଟ୍ ଖୋଳିବା ପରେ ପୋଖରି ଖୋଳିବା କାର୍ଯ୍ୟରେ ନିୟୋଜିତ ଶ୍ରମିକମାନେ ଶଙ୍ଖ ପାଇଥିଲେ । ତେବେ ଏହା ଗୋଟିଏ କିମ୍ବାଦୁଇଟି ନ ଥିଲା । ଏଠାରୁ ଉଦ୍ଧାର ହୋଇଥିଲା ଶତାଧିକ ଶଙ୍ଖ। ଏହି ସବୁ ଶଙ୍ଖକୁ ସଂଗ୍ରହ କରିବାରୁ ଏହାର ସଂଖ୍ୟା ହୋଇଥିଲା ୧୭୪।
ସୂଚନା ଯୋଗ୍ୟ, ଯେ ଜଳେଶ୍ୱର ଗାଁ ଠାରୁ ସମୁଦ୍ର ପ୍ରାୟ ୨୫ କିଲୋମିଟର ଦୂରରେ । ତେଣୁ ସମୁଦ୍ର ଠାରୁ ଏତେ ଦୂରରେ ଏତେ ବିପୁଳ ପରିମାଣର ସାମୁଦ୍ରିକ ଜୀବଙ୍କ ଦେହାବଶେଷ କିପରି ମିଳିଲା ତାକୁ ନେଇ ଏବେ ଚର୍ଚ୍ଚା ଆରମ୍ଭ ହୋଇଯାଇଛି।