ଚଳିତ ବର୍ଷ ରାଜ୍ୟରେ ୧୪% କମ୍ ବର୍ଷା !
କନକ ବ୍ୟୁରୋ : ରାଜ୍ୟରେ ମୌସୁମୀ ସକ୍ରିୟ ରହିଛି । ପ୍ରାୟ ପ୍ରତିଦିନ କେଉଁଠି ନା କେଉଁଠି ବର୍ଷା ବି ହେଉଛି । ଏହା ସତ୍ତ୍ୱେ ଓଡ଼ିଶାରେ ୧୪ ପ୍ରତିଶତ କମ୍ ବର୍ଷା ହୋଇଛି । ନୂଆପଡ଼ା ଜିଲ୍ଲାରେ ୩୪ ପ୍ରତିଶତ କମ୍ ବର୍ଷା ହୋଇଥିବା ବେଳେ ମାଲକାନଗିରି ଜିଲ୍ଲାରେ ୨୭ ପ୍ରତିଶତ ଅଧିକ ବୃଷ୍ଟିପାତ ରେକର୍ଡ କରାଯାଇଛି । ବୃଷ୍ଟିପାତର ଏଭଳି ତାରତମ୍ୟ ଦୃଷ୍ଟିରୁ ରାଜ୍ୟର ପ୍ରାୟ ୨୮୩୩୪ ହେକ୍ଟର ଧାନ ଏବଂ ଅଣଧାନ ଜମି ଚାଷ ଲେଡ଼ାପୋକ ଏବଂ ଅନ୍ୟାନ୍ୟ ରୋଗରେ ଆକ୍ରାନ୍ତ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
କୃଷି ବିଭାଗ ଦେଇଥିବା ତଥ୍ୟ ଅନୁଯାୟୀ ଅଗଷ୍ଟ ମାସ ୧୯ ତାରିଖ ସୁଦ୍ଧା ରାଜ୍ୟରେ ୨୧୮.୨ ମି.ମି. ବୃଷ୍ଟିପାତ ହୋଇଥାଏ । କିନ୍ତୁ ପ୍ରକୃତ ପକ୍ଷେ ହୋଇଛି ୧୮୭.୪ ମି.ମି.। ଅର୍ଥାତ୍ ୧୪.୧ ପ୍ରତିଶତ କମ୍ ବୃଷ୍ଟିପାତ ହୋଇଛି । ତେବେ ରାଜ୍ୟରେ କୃଷି କାର୍ଯ୍ୟ ସ୍ୱାଭାବିକ ଭାବେ ଆଗେଇ ଚାଲିଛି । ଗତବର୍ଷ ଅଗଷ୍ଟ ୧୯ ତାରିଖ ସୁଦ୍ଧା ରାଜ୍ୟରେ ୩୧୫୧.୫୯୯ ହେକ୍ଟର ଜମିରେ ଧାନ ଚାଷ ହୋଇଥିବା ବେଳେ ଗତ ୧୯ ତାରିଖ ବେଳକୁ ୩୨୭୨.୨୬୧ ହେକ୍ଟର ଜମିରେ ଧାନ ଚାଷ ହୋଇଛି । ଧାନ ଚାଷ ଭଳି ଅଣଧାନ ଚାଷ ମଧ୍ୟ ଭଲ ହୋଇଥିବା କୃଷି ବିଭାଗ ରିପୋର୍ଟରେ ଦର୍ଶାଯାଇଛି ।
କିନ୍ତୁ ଫସଲରେ ଲେଡ଼ାପୋକ ସହିତ ଅନ୍ୟାନ୍ୟ ରୋଗ ବ୍ୟାପିବା ଚାଷୀମାନଙ୍କ ପାଇଁ ଚିନ୍ତାର କାରଣ ହୋଇଛି । ଉଭୟ ଧାନ ଏବଂ ଅଣଧାନ ଫସଲରେ ୩୨୩୬୩ ହେକ୍ଟର ଜମିରେ ଏଭଳି ଅବସ୍ଥା ଦେଖାଦେଇଛି । ବିଶେଷ କରି ଧାନ ଫସଲରେ ଜୀବାଣୁ ଜନିତ ପତ୍ରପୋଡ଼ା, ମହିଷା, ହଳଦିଆ ପତ୍ରଡିଆଁ, ପତ୍ରଦାଗ, ମୂଳସଢ଼ା, କାଣ୍ଡବିନ୍ଧା, ଲେଡ଼ାପୋକ, ଗନ୍ଧିପୋକ, ଦହିଆ, ପତ୍ର ଆଚ୍ଛାଦ ସଢ଼ା, ଧଳା ପିଠିଆ ପତ୍ରଡିଆଁ ଆଦି ରୋଗ ହୋଇଥିବା ଜଣାଯାଇଛି । ଇ-ରୋଗପୋକ ସର୍ବେକ୍ଷଣ ଜରିଆରେ ୧୬୪୪୯ ହେକ୍ଟର ଜମିରେ ରୋଗର ନିଦାନ କରାଯାଇଥିବା କୃଷି ବିଭାଗ ଦାବି କରିଛି।
କିନ୍ତୁ ଭୁବନେଶ୍ୱର ପାଣିପାଗ କେନ୍ଦ୍ର ଭିନ୍ନ ତଥ୍ୟ ଦେଇଛି । ଏହାର ତଥ୍ୟ ଅନୁଯାୟୀ ଆଜି ସୁଦ୍ଧା ରାଜ୍ୟରେ ହାରାହାରି ୮୧୦ ମିଲିମିଟର ବର୍ଷା ହେବା କଥା । କିନ୍ତୁ ହୋଇଛି ୭୬୮ ମି.ମି.ର ବୃଷ୍ଟିପାତ । ବୃଷ୍ଟିପାତ ଅଭାବ ଥିବା ଜିଲ୍ଲାଗୁଡ଼ିକ ମଧ୍ୟରେ ରହିଛି ନୂଆପଡ଼ା(୩୪%), ଢେଙ୍କାନାଳ(୩୨%), ବଲାଙ୍ଗୀର(୩୦%), କନ୍ଧମାଳ(୨୯%), ଅନୁଗୁଳ(୨୫%), ଭଦ୍ରକ(୨୩%), ଯାଜପୁର(୨୨%), ନୟାଗଡ଼(୨୦%)। ଅନ୍ୟପକ୍ଷରେ ମାଲକାନଗିରିରେ ହାରାହାରି ୧୨୩୨.୮ ମି.ମି. ବୃଷ୍ଟିପାତ ପରିମାଣଠାରୁ ଅଧିକ ୨୭ ପ୍ରତିଶତ ବର୍ଷା ହୋଇଛି । ସେହିପରି ଗଞ୍ଜାମରେ ୨୬%, ରାୟଗଡ଼ାରେ ୧୮%, ସୁନ୍ଦରଗଡ଼ରେ ୧୬% ଅଧିକ ବର୍ଷା ହୋଇଛି ।