ପାହାନ୍ତି ରାତିର ବଡ଼ ଦୁର୍ଘଟଣା : ନିଦୁଆ ଆଖି ଫିଟିବା ପୂର୍ବରୁ ଚାଲିଗଲା ପ୍ରାଣ, ତପ୍ତପାଣି ଘାଟିରେ ବସ ଦୁର୍ଘଟଣା ମୃତ୍ୟୁ ସଂଖ୍ୟା ୮ରେ ପହଞ୍ଚିଲା
କନକ ବ୍ୟୁରୋ : ସମୟ ପ୍ରାୟ ଥିଲା ୩ଟାରୁ ସାଢ଼େ ୩ଟା । ଜଗି ବସିଥିଲା ମୃତ୍ୟୁ । ବସ୍ ଯାତ୍ରା ହେଲା ଶେଷ ଯାତ୍ରା । ବସରେ ଚାଲିଗଲା ପ୍ରାଣ । କାଳ ହେଲା କୁହୁଡ଼ି । ଶ୍ରୀସାଇ ନାମକ ବସଟି ତପ୍ତପାଣି ଘାଟିରେ ଓଲଟି ପଡ଼ିଲା । ନିଦୁଆ ଆଖି ଫିଟିବା ପୂର୍ବରୁ ଦୁର୍ଘଟଣା ସ୍ଥଳରେ ୫ଜଣଙ୍କ ଜୀବନ ଚାଲିଗଲା । କିଏ ବାପାଙ୍କୁ ହରାଇଲା କିଏ ଭାଇ ତ ଆଉ କିଏ ମା’କୁ । ଘନ ଅନ୍ଧାରରେ ଶୁଭିଲା ଆର୍ତ୍ତ ଚିତ୍କାର । କିଛି ଜାଣିବା ପୂର୍ବରୁ ଚାଲିଗଲା ଜୀବନ ।
Kanak News is now on WhatsApp
Join and get latest news updates delivered to you via WhatsApp
ରାୟଗଡ଼ାର କାଶୀପୁରରୁ ବ୍ରହ୍ମପୁର ଅଭିମୁଖେ ଯାତ୍ରା କରୁଥିବା ଘରୋଇ ଯାତ୍ରୀବାହୀ ବସ୍ ରାତି ପ୍ରାୟ ୩ଟା ବେଳେ ମୋହନା ବ୍ଲକ୍ ଅନ୍ତର୍ଗତ ତପ୍ତପାଣି ଘାଟିରେ ଓଲଟି ପଡ଼ିଥିଲା । ପ୍ରବଳ କୁହୁଡ଼ି ଯୋଗୁଁ ରାସ୍ତା ଅସ୍ପଷ୍ଟ ହୋଇଯାଇଥିବା କାରଣରୁ ବସ୍ଟି ଘାଟିରୁ ତଳକୁ ଖସି ପଡ଼ିଥିବା କଥା କୁହାଯାଉଛି । ରିପୋର୍ଟ ଲେଖା ହେବା ସୁଦ୍ଧା ଦୁର୍ଘଟଣାରେ ୮ଜଣ ଯାତ୍ରୀଙ୍କ ମୃତ୍ୟୁ ହୋଇଥିବା ବେଳେ, ୪୦ରୁ ଅଧିକ ଆହତ ହୋଇଛି । ମେଡ଼ିକାଲରେ ୪ ଜଣଙ୍କ ମୃତ୍ୟୁ ହୋଇଥିବା ସୂଚନା ମିଳିଛି । ଘଟଣାସ୍ଥଳରେ ଦିଗପହଣ୍ଡି ଅଗ୍ନିଶମ ବାହିନୀ ଏବଂ ମୋହନା ବ୍ଲକ୍ ପ୍ରଶାସନ ପହଞ୍ଚି ଉଦ୍ଧାର କାର୍ଯ୍ୟ ଚଳାଇଛନ୍ତି ।
ଗ୍ୟାସ କଟରରେ ବସର ଡୋର କାଟି ଆହତମାନଙ୍କୁ ବାହାରକୁ ଉଦ୍ଧାର କରାଯାଉଛି । ଚିକିତ୍ସା ନିମନ୍ତେ ଆହତମାନଙ୍କୁ ଆମ୍ବୁଲାନ୍ସ୍ ଯୋଗେ ନିଆଯାଇ ଦିଗପହଣ୍ଡି ଏବଂ ବ୍ରହ୍ମପୁର ବଡ଼ ଡାକ୍ତରଖାନାରେ ଭର୍ତ୍ତି କରାଯାଇଛି । ଏମକେସିଜି ମେଡ଼ିକାଲରେ ୧୨ ଜଣ ଗୁରୁତର ଆହତ ଭର୍ତ୍ତି ହୋଇଛନ୍ତି । ସେଥି ମଧ୍ୟରୁ ୩ ଜଣ ମହିଳା ଓ ଅନ୍ୟ ୯ ଜଣ ପୁରୁଷ ଚିକିତ୍ସାଧୀନ ଅବସ୍ଥାରେ ଅଛନ୍ତି । ସେପଟେ ଦୁର୍ଘଟଣାଗ୍ରସ୍ତ ବସ ତଳେ ଏବେ ବି ଅନେକ ଯାତ୍ରୀ ଜୀବିତ ରହିଥିବା ଖବର ମିଳୁଛି ।
ସେପଟେ କାନ୍ଦବୋବାଳିରେ ଫାଟିପଡ଼ୁଛି ମେଡ଼ିକାଲ ପରିସର । ହେଲେ ଦିଗପହଣ୍ଡି ମେଡ଼ିକାଲରେ ଡାକ୍ତରଙ୍କ ଅଭାବ ଯୋଗୁଁ ଆହତ ଓ ଆହତଙ୍କ ସମ୍ପର୍କୀୟମାନେ ଅସନ୍ତୋଷ ପ୍ରକାଶ କରୁଛନ୍ତି । ଏବେ ସୁଦ୍ଧା ଡାକ୍ତରଙ୍କ ଦେଖା ନାହିଁ । ଜଣେ ଫାର୍ମାସିଷ୍ଟଙ୍କ ଆଉ ଜଣେ ଚତୁର୍ଥ ଶ୍ରେଣୀ କର୍ମଚାରୀ ଆହତଙ୍କ ଚିକିତ୍ସା କରୁଛନ୍ତି ।